Dehli xalqaro aeroportida 12 ta to‘tiqushni Toshkentga olib kelishga uringan o‘zbekistonlik qo‘lga olindi

Indira Gandi nomidagi Dehli xalqaro aeroportida 12 ta tirik to‘tiqushni noqonuniy ravishda Toshkentga olib kelishga uringan 24 yoshli O‘zbekiston fuqarosi Anvarjon Rahmatjonov qo‘lga olindi. Bu haqda The Indian Express xabar berdi.

Ma’lum qilinishicha, aeroport bojxona xodimlari yo‘lovchining sumkasini skanerdan o‘tkazayotganda, uning ichidagi oyoq kiyim qutisiga solingan 12 to‘tiqushning tasvirini ko‘rgan. O‘zbekiston fuqarosi to‘tiqushlarning yumshoq o‘yinchoq ekanligini aytgach, bojxona xodimlari ularni tekshirib ko‘rgan va hushsiz holdagi to‘tiqushlar ekanligini aniqlagan.

Anvarjon Rahmatjonov qushlarni noqonuniy ravishda olib chiqib ketishda gumonlanib, bojxona idorasiga olib borilgan.

Rasmiylarning ma’lum qilishicha, O‘zbekiston fuqarosi bojxona qonunchiligi va yovvoyi tabiatni muhofaza qilish bo‘yicha hujjatlarni buzgani uchun qo‘lga olingan va 18-oktabr, juma kuni sud oldida javob beradi.

Bojxona xodimlarining qayd etishicha, O‘zbekiston fuqarosi Uzbekistan Airways reysida Toshkentga uchishni rejalashtirgan edi.

So‘rov davomida ma’lum bo‘lishicha, Rahmatjonov to‘tiqushlarning Toshkentda talab yuqori bo‘lgan turiga kirishini aytgan. U qushlarni O‘zbekistonga olib kelib sotmoqchi bo‘lgan va ularni hushsiz qilish uchun nimadir yedirgan. Uning qayd etishicha, bu Indira Gandi xalqaro aeroportida qayd etilgan qushlarni olib chiqib ketishga urinish bilan bog‘liq birinchi holat bo‘lgan.