O‘zbekistonda bog‘dorchilik va uzumchilikka ixtisoslashgan xo‘jaliklar rivojlanishning navbatdagi bosqichi — eksportbop, bozorda talabgir mahsulotlar yetishtirish bosqichiga o‘tish kerak. Bu haqda O‘zbekiston qishloq xo‘jaligi vaziri Jamshid Xo‘jayev 16-oktabr kuni “Axborot 24” informatsion dasturiga bergan intervyusida ta’kidlab o‘tdi.
16-oktabr kuni O‘zbekiston Prezidenti Shavkat Mirziyoyev chorvachilik va bog‘dorchilik tarmoqlarini rivojlantirish bo‘yicha ustuvor vazifalarga bag‘ishlangan yig‘ilish o‘tkazdi. Davlat rahbarining matbuot xizmati bergan axborotga ko‘ra, O‘zbekistondagi meva-sabzavotga ixtisoslashgan barcha 55 ta tumanda bog‘dorchilik sohasida mutlaqo yangi — kooperatsiya tizimi joriy qilinishi bildirilgan.
Unga ko‘ra, xorij bozorlarida o‘z tovar belgisiga ega bo‘lgan eksportchilar hamda qayta ishlash korxonalari ishtirokida ushbu tumanlarda kooperatsiyalar tashkil etiladi. Har bir tumanda ekinlarni joylashtirish kooperatsiyalar taklifi bo‘yicha amalga oshiriladi, ular bog‘ va tokzorlarga ko‘chatlarni yetkazib berish, hosildorlikni oshirish yuzasidan ko‘maklashadi.
Bugun 180 ming gektar bog‘larimizdan bor-yo‘g‘i 45 ming gektari intensiv hisoblanadi. Ularning aksariyati yurtboshimiz 2019-yil boshida Bog‘dorchilik va issiqxona xo‘jaligini rivojlantirish agentligi, Uzumchilik va vinochilikni rivojlantirish agentligini tashkil qilganlaridan so‘ng ishga tushdi.Prezident matbuot xizmatining qo‘shimcha qilishicha, Prezident raisligidagi yig‘ilishda Moliya vazirligi va Qishloq xo‘jaligi vazirligiga yangi tizimni joriy etish, kooperatsiyalarni moliyaviy ta’minlash yuzasidan aniq amaliy takliflar ishlab chiqish topshirilgan.Hozirgi jarayonlar bog‘dorchilik va uzumchilikni rivojlantirishning birinchi bosqichi deb olinadigan bo‘lsa, endi keyingi bosqichga — eski bog‘larni yangilash, iqtisodiy samara bermayotgan ekinlar o‘rniga eksportbop, bozorlarda talabgir mahsulotlar yetishtirish bosqichiga o‘tish kerak. Shunday topshiriqlar bo‘ldi.
Agar hozir oddiy fermerga intensiv bog‘ tashkil qil, deb masala qo‘yadigan bo‘lsak, u, albatta, o‘z bozorini topishga, qanday nav ekish masalasida ancha qiynaladi. Shu bois yangi mexanizmni tashkil qilish bo‘yicha topshiriq bo‘ldi. Bu — uch tomonlama kooperatsiya tizimi bo‘ladi.
Qayta ishlab chiqarish quvvatlariga ega ilg‘or korxonalar o‘z ehtiyojidan kelib chiqib, buyurtma asosida fermerlar bilan hamkorlikda ishlaydi. Kooperatsiya bog‘ yaratishda ham ilm, ham texnologiya, ham mahsulotga bozor topish bilan yordam beradi. Fermer faqat mahsulot yetishtirish bilan band bo‘ladi.
Jamshid Xo‘jayev, O‘zbekiston qishloq xo‘jaligi vaziri
Izoh (0)