Президент Шавкат Мирзиёев раислигида 16 октябрь куни чорвачилик ва боғдорчилик тармоқларини ривожлантириш бўйича устувор вазифаларга бағишлаб ўтказилган йиғилишда соҳада илмий ёндашувни кучайтириш, малакали кадрларни кўпайтиришга ҳам алоҳида қаратилган. Бу ҳақда Тошкент давлат аграр университети ректори Ботиржон Сулаймонов «Ахборот 24» информацион дастурига берган интервьюсида маълум қилди.
«Йиғилишда экспорт соҳасига жуда катта эътибор берилди. Илмсиз боғдорчилик соҳасини, умуман, қишлоқ хўжалигини ривожлантириб бўлмаслиги, маҳсулотларни экспортга олиб чиқиш учун ҳам, албатта, илмий ёндашув кераклиги таъкидлаб ўтилди», — дейди ректор.
Президент матбуот хизматининг қайд этишича, «йиғилишда боғдорчиликка ихтисослашган ҳар бир туманда агротехник тадбирларни тўғри амалга ошириш учун ўқув марказларини очиш вазифаси қўйилган». Ректор Ботиржон Сулаймонов бу борада шундай деди:
«Ҳақиқатан ҳам бизда шу вақтгача боғдорчилик бўйича ёки узумчилик соҳаси бўйича мутахассислар тайёрланган эмас. Шунинг учун ҳам соҳадаги кадрларни кўпайтириш, мева-сабзавотчиликка ихтисослашган 55 та туманда олимлар фаолият олиб бориши, кадрлар тайёрлаши учун филиаллар очиш бўйича топшириқлар берилди».«Қибрай ва Тошкент туманлари ўрганилганда, 30, 40, ҳатто 70 йиллик узумзорлар, боғлар борлиги аниқланди. Ҳосилдорликни ошириш учун янги технологияларга асосланган усулларни кўпайтириш, ҳозирги замон талабидан келиб чиқиб етиштириш технологияларини ишлаб чиқиш бўйича жуда катта вазифалар қўйилди», — дея қўшимча қилди Аграр университет ректори.
Аввалроқ Ўзбекистон қишлоқ хўжалиги вазири Жамшид Хўжаев эски боғларни янгилаш зарурлигини таъкидлагани ҳақида хабар берилган эди.
Изоҳ (0)