Shavkat Mirziyoyev metsenatlikni qo‘llab-quvvatlash to‘g‘risidagi qonunni imzoladi

O‘zbekiston Respublikasining “Metsenatlik to‘g‘risida”gi qonuni Prezident tomonidan imzolandi. Bu haqda “Huquqiy axborot” kanali xabar berdi.

Qonunga muvofiq, metsenatlik madaniyat va san’at, ilm-fan, ta’lim, ma’rifat hamda ushbu sohalarni rivojlantirish bilan bog‘liq boshqa faoliyat sohasida jismoniy va yuridik shaxslar tomonidan amalga oshiriladigan homiylik faoliyatidir.

Jismoniy va yuridik shaxslar metsenatlik faoliyatini ixtiyoriylik hamda bu faoliyatning maqsadlarini erkin tanlash asosida moneliksiz amalga oshirishga haqlidir.

Metsenatlik faoliyati metsenat va metsenatlik ko‘magini oluvchi o‘rtasida tuziladigan shartnoma asosida amalga oshiriladi.

Shuningdek qonunga ko‘ra, davlat metsenatlarga soliq va boshqa majburiy to‘lovlar hamda tariflar bo‘yicha imtiyozlar va preferensiyalar berish kabilar orqali ushbu faoliyatni qo‘llab-quvvatlaydi.

Metsenatlik ko‘magi davlat budjeti mablag‘lari hisobidan amalga oshirilishi mumkin emas.