“Suriya demokratik kengashi” (“Suriya demokratik kuchlari”ning siyosiy kengashi) Misrdan ko‘mak so‘radi, deya xabar berdi “RIA Novosti”.
Kengashning hamraisi Riyod Darar Qohirada o‘tgan Arab davlatlari ligasining Turkiyaning Suriyadagi harbiy harakatlariga bag‘ishlangan sammitidan bir necha soat oldin Misr tashqi ishlar vaziri Sameh Shukriy bilan uchrashuv o‘tkazgan.
Dararning so‘zlariga ko‘ra, u Qohiraga Misr rasmiylarining taklifi bo‘yicha kelgan.
“Ulardan yordam so‘radik, hozir bizga ushbu tajovuzlarga qarshi kurash uchun ham siyosiy ham axborot tomonlama ko‘mak zarur”, — deya qayd etgan kurd siyosatchisi.
Kengash hamraisi Misr tashqi ishlar vaziri bilan suhbat chog‘ida “Suriya demokratik kengashi” ushbu tajovuzlarni to‘xtatish uchun har qanday yechimga tayyorligini ma’lum qilgan.
“Biz hujumlarga qarshi turishga qaror qildik. Vatanimizni, o‘zimizni va oilalarimizni himoya qilish uchun kurashamiz”, — deydi Darar.
Turkiya prezidenti Rajab Toyyib Erdo‘g‘on 9-oktabrda Suriya shimolida Turkiyaning Kurdiston ishchi partiyasi hamda IShID jangarilariga qarshi “Tinchlik bulog‘i” harbiy operatsiyalarining boshlanishini e’lon qildi. Keyinchalik Turkiya harbiy havo kuchlari Ras al-Ayn shahriga va Suriyaning ikki davlat chegarasidagi boshqa hududlariga havodan hujum uyushtirdi. So‘ngra turk harbiy askarlarining chegarani buzib Suriya hududiga kirgani xabar qilindi.
Anqaraning bahordan beri rejalashtirib kelgan ushbu operatsiyadan ko‘zlagan asosiy maqsadlari ikki davlat chegarasi oralig‘ini Suriyadagi kurdlar himoya otryadlaridan tozalash, u yerda xavfsiz hudud tashkil qilish va ushbu zonaga Turkiyadagi suriyalik qochoqlarni joylashtirishdan iborat. Rasmiy ma’lumotlarga ko‘ra Turkiya hududiga 4 million nafar suriyalik qochoqlar joylashib olgan.O‘z navbatida rasmiy Damashq ham Suriya shimoli-sharqiga joylashib, Frot daryosi sharqidagi hududlar boshqaruvini nazoratiga olgan “Suriya demokratik kuchlari” harbiy qanotini davlat sifatida tan olmagan. Damashq kurdlar avtonom administratsiyasi bilan bir necha bora muzokaralar o‘tkazgan va ular samara bermagan. Suriya hukumati Turkiyaning mamlakat shimolidagi harbiy siyosatini ham qoralab keladi.
Izoh (0)