AQSh Saudiya Arabistoniga 3 ming nafar harbiy yubormoqchi

AQSh Mudofaa vazirligi Saudiya Arabistoniga qo‘shimcha harbiy kuchlar yuborilishini ma’qulladi. Bu haqda 11-oktabr kuni CNN jurnalisti Rayan Braun Pentagonga tayanib, o‘zining Twitter’ida ma’lum qilgan.

“Qo‘shimcha kuch sifatida jami 3 ming nafar odam yuboriladi. Bunday qaror so‘nggi oy davomida tasdiqlangan. AQSh Eron rejimi bilan ziddiyatga bormoqchi emas, ammo biz mintaqada jiddiy harbiy kuchni saqlab qolamiz”, — deya harbiylar bayonotidan iqtibos keltirgan Braun.

Braun AQSh Mudofaa vaziri Mark Esper qirolikka 2 ta qiruvchi eskadrili, 1 ta (AEW) ekspeditsiya qanoti, 1 ta THAAD tizimi va 2 ta Patriot tizimi raketa batareyalarini yuborishga ruxsat berganini ham ma’lum qilgan.

Eslatib o‘tamiz, 11-oktabr kuni Saudiya Arabistonining Jidda portiga yaqin hududda Eron neft tankeri portlagan edi. Portlash terrorchilar tomonidan amalga oshirilgan degan taxminlar mavjud, biroq bu borada rasmiy ma’lumot berilmagan.

14-sentabrga o‘tar kechasi esa Saudiya Arabistonining milliy neft kompaniyasi — Saudi Aramco obyektlariga dronlar yordamida hujum uyushtirilib, portlash sodir bo‘lgandi. AQSh hukumati ushbu hujumni Eron amalga oshirgan deb gumon qilmoqda.