«Сурия демократик кенгаши» («Сурия демократик кучлари»нинг сиёсий кенгаши) Мисрдан кўмак сўради, дея хабар берди «РИА Новости».
Кенгашнинг ҳамраиси Риёд Дарар Қоҳирада ўтган Араб давлатлари лигасининг Туркиянинг Суриядаги ҳарбий ҳаракатларига бағишланган саммитидан бир неча соат олдин Миср ташқи ишлар вазири Самеҳ Шукрий билан учрашув ўтказган.
Дарарнинг сўзларига кўра, у Қоҳирага Миср расмийларининг таклифи бўйича келган.
«Улардан ёрдам сўрадик, ҳозир бизга ушбу тажовузларга қарши кураш учун ҳам сиёсий ҳам ахборот томонлама кўмак зарур», — дея қайд этган курд сиёсатчиси.
Кенгаш ҳамраиси Миср ташқи ишлар вазири билан суҳбат чоғида «Сурия демократик кенгаши» ушбу тажовузларни тўхтатиш учун ҳар қандай ечимга тайёрлигини маълум қилган.
«Биз ҳужумларга қарши туришга қарор қилдик. Ватанимизни, ўзимизни ва оилаларимизни ҳимоя қилиш учун курашамиз», — дейди Дарар.
Туркия президенти Ражаб Тоййиб Эрдўғон 9 октябрда Сурия шимолида Туркиянинг Курдистон ишчи партияси ҳамда ИШИД жангариларига қарши «Тинчлик булоғи» ҳарбий операцияларининг бошланишини эълон қилди. Кейинчалик Туркия ҳарбий ҳаво кучлари Рас ал-Айн шаҳрига ва Суриянинг икки давлат чегарасидаги бошқа ҳудудларига ҳаводан ҳужум уюштирди. Сўнгра турк ҳарбий аскарларининг чегарани бузиб Сурия ҳудудига киргани хабар қилинди.
Анқаранинг баҳордан бери режалаштириб келган ушбу операциядан кўзлаган асосий мақсадлари икки давлат чегараси оралиғини Суриядаги курдлар ҳимоя отрядларидан тозалаш, у ерда хавфсиз ҳудуд ташкил қилиш ва ушбу зонага Туркиядаги суриялик қочоқларни жойлаштиришдан иборат. Расмий маълумотларга кўра Туркия ҳудудига 4 миллион нафар суриялик қочоқлар жойлашиб олган.Ўз навбатида расмий Дамашқ ҳам Сурия шимоли-шарқига жойлашиб, Фрот дарёси шарқидаги ҳудудлар бошқарувини назоратига олган «Сурия демократик кучлари» ҳарбий қанотини давлат сифатида тан олмаган. Дамашқ курдлар автоном администрацияси билан бир неча бора музокаралар ўтказган ва улар самара бермаган. Сурия ҳукумати Туркиянинг мамлакат шимолидаги ҳарбий сиёсатини ҳам қоралаб келади.
Изоҳ (0)