Qirg‘izistonning Botken viloyatidagi ko‘mir konlarida 6 kishi is gazidan zaharlanish natijasida vafot etdi, deb xabar bermoqda “24.kg”.
Birinchi hodisa 5-oktabrda Sulyukt shahrida O‘rta Osiyodagi ko‘hna va Qirg‘izistondagi eng katta ko‘mir konlaridan birida sodir bo‘lgan. 40, 43, va 44 yoshdagi uch aka-uka “Abduxakar-Ken” MChJga qarashli konda is gazidan zaharlangan va qutqaruvchilar tomonidan shifoxonaga yetkazilib, u yerda vafot etgan. Yana ikki nafar zaharlangan fuqaroning holati qoniqarli darajada ekani aytilgan.
Ikkinchi hodisa Qizil-Qiya shahrida 6-oktabr, yakshanba kuni kuzatilgan. Qutqaruvchilar uch nafar 21, 32 va 42 yoshdagi ko‘mir qazuvchilarning jasadlarini tashqariga olib chiqqan. Ular Lo‘kat tumanida yashovchi fuqarolar bo‘lgan.
Nashrning yozishicha, zaharlanish mahalliy vaqt bilan soat 13:00 da Qadamjoy tumanining “Uch-Qo‘rg‘on” fuqarolar yig‘inidagi Bo‘z qishlog‘ida 35—40 metr chuqurlikda joylashgan shaxtada sodir bo‘lgan. Uchala ishchi ham texnika xavfsiziligi qoidalariga rioya qilmagan holda o‘zboshimchalik bilan ko‘mir qazib olishga uringan.
Izoh (0)