Afg‘oniston prezidenti TIV matbuot kotibini ishdan haydadi. Mamlakat bosh vaziri esa uni o‘z lavozimiga qayta tikladi

Afg‘oniston prezidenti Muhammad Ashraf G‘ani Tashqi ishlar vazirligi matbuot kotibi Sibgatullo Ahmadiyni “Tolibon” harakati delegatsiyasining Pokistonga tashrifi haqida fikr bildirgani uchun ishdan haydadi, deb yozadi “Afganistan.ru”.

Tashqi ishlar vazirligi rasmiy vakili “Tolibon” harakatining Islomobodga tashrifini qo‘llab-quvvatlagandi. Ahmadiy ijtimoiy tarmoqdagi xabarida Pokiston tomonidan amalga oshirilayotgan harakatlar Afg‘onistonda tinchlikni ta’minlashga xizmat qilishini qayd etgan.

Oqibatda prezident saroyi Pokistonda “Tolibon” harakati delegatsiyasining qabul qilinishi diplomatik normalarni buzish ekanligi, TIV rasmiy vakilining bunga bergan sharhi esa hukumat pozitsiyasini anglatmasligi va shaxsiy fikr ekanligini qayd etdi.

Yakshanbada davlat rahbari Ahmadiyni egallab turgan lavozimidan chetlatdi va uning o‘rniga Mirvays Nabini tayinladi.

7-oktabr kuni Afg‘oniston bosh vaziri, hukumat rahbari Abdulla Abdulla prezident Muhammad Ashraf G‘anining TIV matbuot kotibi Sibgatullo Ahmadiyning ishdan olinishi yuzasidan chiqargan qarorini o‘zgartirdi. Bu haqda bosh vazir matbuoti kotibi Mujib Rahimiyga tayanib “Interfaks” xabar berdi.

“Sibgatullo Ahmadiy tinchlik jarayoni haqida fikr bildirgan vaqtida mamlakat tashqi ishlar vazirligi nuqtayi-nazarini ham ko‘zda tutgan. Bunday davrda tayinlov yoki ishdan bo‘shatishni saylovlar natijalari ma’lum bo‘lganidan so‘ng, amalga oshirish maqsadga muvofiq. Natijalar e’lon qilinguniga qadar ular o‘z ish faoliyatini davom ettiraveradi.Tashqi siyosat va afg‘on hukumatining bu boradagi pozitsiyasi masalalari alohida yuqori darajadagi muhokamalar va hukumat bilan kelishuv asosida hal etiladi. Shunda hukumatning barcha tarkibiy qismlari bir pozitsiyada turishi va bir ovozdan gapirishi ta’minlanadi”, — deyiladi bosh vazirning matbuot kotibi e’lon qilgan bayonotda.