Eron oliy yetakchisi Oyatulloh Ali Xomanaiy “dushmanlar” Eron hamda Iroq o‘rtasiga nifoq sola olmasligini bildirdi, deb yozmoqda “RIA Novosti”.
“Iroq va Eron — yuraklari va qalblari imon nuri, Muhammad (s.a.v.) payg‘ambar va imom Husaynga muhabbat ila Allohga bog‘langan ikki xalq. Bu xalqlar ittifoqi kundan kunga mustahkamlanib boradi. Dushmanlar ular o‘rtasiga nifoq solishga urinadi, lekin har safar buning uddasidan chiqa olmaydi. Ularning fitnalari hech qachon amalga oshmaydi”, — deya qayd etilgan Xomanaiyning Twitter’dagi xabarida.
Iroqda 1-oktabrda mamlakatdagi ishsizlik, korrupsiya hamda iqtisodiy tanglik sabab boshlangan hukumatga qarshi norozilik namoyishlari hali ham davom etmoqda. Iroq hukumati tepasiga Odil Abdul Mahdi kelganidan beri bu kabi noroziliklar ilk bor kuzatilmoqda. Namoyishlar vaqtida shaharlarda tartibsizliklar avj olmoqda, norozilik ishtirokchilari va kuchishlatar tizimlar vakillari o‘rtasida to‘qnashuvlar ro‘y bermoqda.Iroq IIV ma’lumotiga ko‘ra, norozilik namoyishlari oqibatida halok bo‘lganlar soni 104 nafarga yetdi, 6 mingdan ortiq odam turli darajadagi jarohatlar oldi. Iroqdagi hech bir partiya va siyosiy yetakchi noroziliklar ortida qanday kuchlar turganiga izoh bermagan. BMT mamlakatdagi kuchishlatar tizim vakillaridan namoyishlar vaqtida fuqarolarga nisbatan zo‘ravonlik qilmaslikni va tinch aholi vakillarining o‘limi yuzasidan ochiq tergov o‘tkazishni so‘ragan.
Avval Eron tashqi ishlar vazirligi Iroq hukumatining mamlakatda davom etayotgan noroziliklar bo‘yicha vaziyatni o‘zgartira olishiga Tehronning ishonishini ma’lum qilgan. Shuningdek, vazirlik Eronning Iroq hukumati siyosiy kuchlari va diniy ulamolarini xorijdagi kuchlar ushbu vaziyatdan o‘z manfaati yo‘lida foydalanishi mumkinligi haqida ogohlantirgan.
Izoh (0)