O‘zbekiston Oliy Majlisi Qonunchilik palatasida Tojikiston parlamenti quyi palatasi vakillari bilan 7-oktyabr kuni uchrashuv bo‘lib o‘tdi. Bu haqda “Daryo” muxbiri Musulmonbek Ibrohimov xabar bermoqda.
Muzokaralar yakunida O‘zbekiston Oliy Majlisi Qonunchilik palatasi va Tojikiston parlamenti quyi palatasi o‘rtasida parlamentlararo hamkorlik to‘g‘risida bitimi imzolandi.
O‘zaro kelishuvga ko‘ra:
- Taraflar o‘z mamlakatlari qonun hujjatlariga muvofiq hamkorlik qiladi hamda o‘z vakolatlari doirasida O‘zbekiston va Tojikiston respublikasi o‘zaro manfaat kasb etuvchi turli sohalardagi munosabatlarning mustahkamlanishiga ko‘maklashadi.
- O‘z qo‘mitalari va komissiyalari, deputatlik guruhlari, devonlari o‘rtasida doimiy aloqalar o‘rnatilishiga ko‘maklashadi, qonun hujjatlarini ishlab chiqish va qabul qilish amaliyotini, parlament faoliyati tajribasini o‘rganish maqsadida delegatsiyalar bilan almashadi.
- Taraflardan har birida o‘tkaziladigan, boshqa Tomon uchun manfaat kasb etuvchi masalalarga daxldor konferensiyalar, seminarlar, simpoziumlarda taraflar devonlari xodimlarining ishtirok etishini ta’minlashda bir-biriga ko‘maklashadi.
- Manfaat kasb etuvchi xalqaro masalalar yuzasidan maslahatlashuvlar o‘tkazadi, xalqaro tashkilotlar va konferensiyalar doirasida hamkorlikni amalga oshiradi va bir-biriga ko‘maklashadi.
Uchrashuv yakunida Tojikiston parlamenti vakillari mamlakatda bo‘lib o‘tadigan parlament saylovlarida xalqaro kuzatuvchi sifatida ishtirok etish uchun taklif etildi.
Tojikiston parlamenti delegatsiyasining O‘zbekistonga tashrifi 8-oktabrgacha davom etadi.
Izoh (0)