“O‘ztransgaz” aksiyadorlik jamiyatiga qarashli mintaqaviy gaz ta’minoti korxonalarining 2018-yil va 2019-yilning 1-choragida tadbirkorlik subyektlariga tabiiy gaz yetkazib berish borasidagi faoliyati Monopoliyaga qarshi kurashish qo‘mitasi tomonidan o‘rganildi.
Qo‘mita matbuot xizmatining ma’lum qilishicha, o‘rganishlar natijasida gaz ta’minoti korxonalari tomonidan 188 milliard so‘m daromad noqonuniy o‘zlashtirilgani aniqlangan. Respublika bo‘yicha 8 701 ta holatda mintaqaviy gaz ta’minoti korxonalari tomonidan belgilangan tariflarning asossiz oshirilishi va oldindan to‘langan to‘lovlarni hisobga olmaslik kabi qonun buzilishlarga yo‘l qo‘yilgan.
Qayd etilishicha, amaldagi qonunchilikka muvofiq, tarif o‘zgargan holatlarda iste’molchi yetkazib beriladigan tabiiy gaz uchun oldindan to‘lov to‘langan kundan e’tiboran keyingi keladigan 2 oy mobaynida qo‘shimcha to‘lov to‘lashdan ozod etiladi.
Masalan, pishgan g‘isht, sement, asfalt ishlab chiqarish, shuningdek, ohaktosh va gipsni ishlab chiqarish va qayta ishlash bilan shug‘ullanuvchi korxonalar uchun, restoranlar, kafelar, tantanalar o‘tkaziladigan boshqa obyektlar uchun tabiiy gazning oshirilgan tariflari qo‘llaniladi.
Namangan viloyati, To‘raqo‘rg‘on tumanida faoliyat yuritayotgan “Davr metall” MChJ tomonidan 2018-yilning fevral oyida foydalanilgan 58 157 metr kub tabiiy gaz uchun belgilangan 263,4 so‘m o‘rniga 1000 so‘mdan haq hisoblangan, natijada gaz ta’minoti korxonasi tomonidan 42,8 million so‘m asossiz foyda olingan.
Shuningdek, “Gulobod Osiyo Parranda” MChJ tomonidan 2018-yilning 1-noyabr holatiga ko‘ra 34,4 milliard so‘m oldindan to‘langan summa hisobga kiritilmagan va natijada 2018-yilning 1-noyabridan tariflarni oshishi munosabati bilan jamiyat qo‘shimcha to‘lovlarni to‘lashdan ozod etilmagan.
Aniqlangan qonun buzilish holatlarini viloyatlar kesimida quyidagicha ko‘rinishda:
- Buxoro viloyati bo‘yicha — 300 holatda 407,6 million so‘m;
- Jizzax viloyati bo‘yicha — 620 holatda 1 942,5 million so‘m;
- Qashqadaryo viloyati bo‘yicha — 516 holatda 88 019,9 million so‘m;
- Navoiy viloyati bo‘yicha — 22 holatda 59 150,4 million so‘m;
- Namangan viloyati bo‘yicha — 302 holatda 1 770,2 million so‘m;
- Samarqand viloyati bo‘yicha — 3737 holatda 11 935,0 million so‘m;
- Sirdaryo viloyati bo‘yicha — 56 holatda 119,5 million so‘m;
- Surxondaryo viloyati bo‘yicha — 509 holatda 10 534,1 million so‘m;
- Toshkent viloyati bo‘yicha — 1203 holatda 3 290,4 million so‘m;
- Farg‘ona viloyati bo‘yicha — 23 holatda 240,0 million so‘m;
- Xorazm viloyati bo‘yicha — 1413 holatda 10 866,3 million so‘m.
Izoh (0)