O‘zbekistonda elektron OAVlar senzurasiga yo‘l qo‘yilmasligi qonun bilan belgilanmoqda

Normativ-huquqiy hujjatlar loyihalari muhokamasi portalida “Teleradiouzatish to‘g‘risida”gi O‘zbekiston Respublikasi qonuni loyihasi e’lon qilindi.

Hujjatga muvofiq, milliy teleradiouzatish tizimiga davlat, xususiy, jamoatchilik va xorijiy teleradiotashkilotlar kirishi mumkin. Xorijiy fuqarolar va kompaniyalar faqat yuridik shaxs sifatida ro‘yxatdan o‘tgandan keyin efirga uzatish bilan shug‘ullana oladi. Shu bilan birga, chet ellik ta’sischining ulushi 30 foizdan oshib ketmasligi lozim.

Uzatuvchi tashkilotlarni xorijiy fuqarolar va fuqaroligi bo‘lmagan shaxslar, faoliyati man etilgan NNTlar, siyosiy partiyalar, kasaba uyushmlari va diniy tashkilotlar tomonidan ta’sis etilishiga yo‘l qo‘yilmaydi.

Teleradiouzatish sohasidagi litsenziya beruvchi organ Teleradiouzatish kengashi hisoblanadi.

Qonunning 25-moddasiga ko‘ra, O‘zbekistonda elektron ommaviy axborot vositalari senzurasiga yo‘l qo‘yilmaydi. Hech kim uzatuvchi tomonidan tarqatilayotgan xabarlar yoki materiallarning mazmunini oldindan tasdiqlatish, matnni o‘zgartirish yoki efirdan to‘liq olib tashlashni talab qilishga haqli emas.

Qonunning 27-moddasiga binoan, teleradiouzatish sohasini monopollashtirishga yo‘l qo‘yilmaydi. Shuningdek, bu sohadagi yetakchilik o‘rnini suiiste’mol qilishga ham yo‘l qo‘yilmaydi.Qonun loyihasida aytilishicha, davlat teleradio tashkilotlarini moliyaviy-siyosiy guruhlar va davlat hokimiyati hamda mahalliy o‘z-o‘zini boshqaruv organlari moliyaviy va siyosiy bosimidan himoya qilishni kafolatlaydi.

Bosim o‘tkazish yoki faoliyatiga aralashish holatlari aniqlangan taqdirda, aybdor tomon teleradiouzatuvchiga yetkazilgan ma’naviy va moddiy zarar, shuningdek, aralashuv oqibatlaridan kelib chiqishi mumkin bo‘lgan zararni qoplashi shart.

Kompensatsiya miqdori bazaviy hisoblash miqdorining 100 baravaridan kam bo‘lishi mumkin emas. Shu miqdordagi summani aybdor tomon davlat foydasiga ham to‘lab beradi.