DSQ raisining o‘rinbosari paxta teruvchilar uchun 200 ming dollar yutuqli konkurs uyushtirmoqchi

Daniya qirolligida axborot-kommunikatsiya texnologiyalari sohasida ishlab, O‘zbekistonga qaytgan va yaqinda Davlat soliq qo‘mitasi raisi o‘rinbosari lavozimiga tayinlangan Abdulla Azizov 5-oktabr, shanba kuni paxtaga chiqdi.

Bu haqda uning o‘zi Facebook’dagi sahifasida quyidagilarni ma’lum qilgan:

Kecha paxtaga chiqishdan ikkita maqsad bor edi:

Birinchidan, Davlat soliq qo‘mitasi xodimlarini qo‘llab-quvvatlash. Bir-birimizni eshitib, to‘g‘ri yo‘l ko‘rsatib, qo‘llab-quvvatlab, kuchli komanda bo‘lamiz.

Ikkinchidan, paxta terim jarayonini o‘z ko‘zim bilan ko‘rib o‘rganish, protsessni optimallashtirish va avtomatizatsiyalash.

Yaxshi idealar (g‘oya — tahririyat) keldi. Sizlar bilan bo‘lishmoqchiman. Maqsad, terim jarayonida inson ishtirokini kamaytirib, paxta unumini oshirish.

Konkurs uyushtirishni niyat qildim. Konkursda hamma qatnashishi mumkin. Yutuq 50 000—200 000 AQSh dollari, agar imkon bo‘lsa undan ham yuqori bo‘lishi kerak. Buning ustida ishlab, fondlardan bo‘lsa ham mablag‘ topamiz.

Hozir terimda 1 kilogramm uchun o‘rtacha 1 000 so‘m berilarkan. Yangi yechimda terim harajati bundan arzon, tez va foydali bo‘lishi kerak. Yechimda, albatta, IT texnologiyasidan foydalanilishi kerak. Ishtirokchilar guruh bo‘lib qatnashsa, guruhda paxta yetishtirgan, paxta yetishtirish bilan shug‘ullangan olim va albatta, kamida 2 ta IT mutaxassisi bo‘lsa, sovrindor bo‘lish ehtimoli katta bo‘ladi.

Yondashuv “out of box” bo‘lishi kerak. O‘zimning idealarimni ham berishga tayyorman, agar ishtirokchilarni o‘zgacha yondashuviga yordami tegsa.

Abdulla Azizov, Davlat soliq qo‘mitasi raisi o‘rinbosari