Qirg‘izistonning sobiq ichki ishlar vaziri o‘rinbosari Kursan Asanovning o‘g‘li O‘sh viloyatidagi “Dostuk” nazorat-o‘tkazish punkti orqali O‘zbekistonga qochib ketgan. Bu haqda 7—8-avgustda Qo‘y-Tosh qishlog‘idagi voqealarni o‘rganish bo‘yicha davlat komissiyasining navbatdagi yig‘ilishida harbiy prokuratura vakili Nurkamol Nabiyev ma’lum qildi, deb xabar beradi “KNews.kg”.
Nabiyevning aytishicha, Asanovning o‘g‘li dastlab gumonlanuvchi sifatida qaralmagan.
“Biroq ish shunga qarab ketayotgandi, unga nisbatan ko‘rsatmalar berilgan. Uni so‘roq qilmoqchi bo‘lganimizda, u qochib ketdi”, — deydi prokuratura vakili.
1997-yilda tug‘ilgan Muhammadali Asanov xizmat mavqeini suiiste’mol qilishga sheriklikda gumon qilinmoqda. U qidiruvga berilgan. Unga nisbatan ehtiyot chorasi sifatida sirtdan hibsga olish hukmi chiqarilgan.
13-avgustda Kursan Asanov “militsiya manfaatlariga xoinlik qilgani” uchun o‘z lavozimidan olingandi. Unga nisbatan xizmat mavqeini suiiste’mol qilish moddasi bo‘yicha jinoiy ish qo‘zg‘atilgan.
“Kun.uz” nashrining yozishicha, O‘zbekiston huquq-tartibot idoralari va tashqi ishlar vazirligi tomonidan Muhammadali Asanovning O‘zbekistonga qochib ketgani haqidagi ma’lumotlarga izoh berilmagan. Toshkent shahar ichki ishlar bosh boshqarmasi matbuot xizmati boshqarma bu haqda hech qanday ma’lumotga ega emasligi ma’lum qilingan.
Izoh (0)