Қирғизистоннинг собиқ ички ишлар вазири ўринбосари Курсан Асановнинг ўғли Ўш вилоятидаги «Достук» назорат-ўтказиш пункти орқали Ўзбекистонга қочиб кетган. Бу ҳақда 7—8 августда Қўй-Тош қишлоғидаги воқеаларни ўрганиш бўйича давлат комиссиясининг навбатдаги йиғилишида ҳарбий прокуратура вакили Нуркамол Набиев маълум қилди, деб хабар беради «KNews.kg».
Набиевнинг айтишича, Асановнинг ўғли дастлаб гумонланувчи сифатида қаралмаган.
«Бироқ иш шунга қараб кетаётганди, унга нисбатан кўрсатмалар берилган. Уни сўроқ қилмоқчи бўлганимизда, у қочиб кетди», — дейди прокуратура вакили.
1997 йилда туғилган Муҳаммадали Асанов хизмат мавқеини суиистеъмол қилишга шерикликда гумон қилинмоқда. У қидирувга берилган. Унга нисбатан эҳтиёт чораси сифатида сиртдан ҳибсга олиш ҳукми чиқарилган.
13 августда Курсан Асанов «милиция манфаатларига хоинлик қилгани» учун ўз лавозимидан олинганди. Унга нисбатан хизмат мавқеини суиистеъмол қилиш моддаси бўйича жиноий иш қўзғатилган.
«Kun.uz» нашрининг ёзишича, Ўзбекистон ҳуқуқ-тартибот идоралари ва ташқи ишлар вазирлиги томонидан Муҳаммадали Асановнинг Ўзбекистонга қочиб кетгани ҳақидаги маълумотларга изоҳ берилмаган. Тошкент шаҳар ички ишлар бош бошқармаси матбуот хизмати бошқарма бу ҳақда ҳеч қандай маълумотга эга эмаслиги маълум қилинган.
Изоҳ (0)