“Karantin ostidagi mahsulotlar uchun ruxsat etish xususiyatiga ega hujjatlarni berishda ushbu mahsulotlar fitosanitariya holatini o‘rganish maqsadida mutaxassislarni xorijiy mamlakatlarga yuborish zaruratini aniqlash mezonlari va yuborish tartibi to‘g‘risida”gi nizomni tasdiqlash to‘g‘risidagi buyruq Adliya vazirligida davlat ro‘yxatidan o‘tkazildi. Bu haqda “Huquqiy axborot” kanali xabar berdi.
Nizomga ko‘ra, O‘zbekistonga xorijiy mamlakat hududidan karantin ostidagi mahsulot bilan xavfli zararli organizmlar kirib kelishi xavfi mavjud bo‘lganda xorijdagi karantin ostidagi mahsulotning fitosanitar holatini o‘rganish uchun mutaxassislar yuboriladi.
Mahsulotning fitosanitar holatini o‘rganish Vazirlar Mahkamasi huzuridagi O‘simliklar karantini davlat inspeksiyasi mutaxassislari tomonidan amalga oshiriladi.
Buning uchun jismoniy yoki yuridik shaxslar mutaxassis yuborishni so‘rab inspeksiyaga ariza bilan murojaat qiladilar.
Ariza 7 ish kuni ichida ko‘rib chiqilib, xorijiy mamlakat hududiga mutaxassis yuborishga zarurat mavjudligi o‘rganiladi hamda murojaatchiga xabar beriladi.
Mahsulotning fitosanitar holatini o‘rganish bilan bog‘liq barcha xarajatlar tomonlarning o‘zaro kelishuviga (shartnomaga) ko‘ra murojaatchi va (yoki) xorijiy mamlakatning vakolatli organi tomonidan amalga oshiriladi.
Izoh (0)