Andijon viloyatining Andijon tumanida 10 milliard so‘mlik loyiha asosida “Horse king” yilqichilik va ot sporti klubi majmuasi foydalanishga topshirildi. Bu haqda “Daryo” muxbiri Umidjon Mamarasulov xabar bermoqda.
Zamonaviy majmua Xrabek qishlog‘idan ajratib berilgan 12 gektar maydonda joylashgan. Shundan 5 gektari bino va sport inshootlari bo‘lsa, 7 gektarida oziqa bazasi uchun beda yetishtiriladi.
Germaniyalik mutaxassislar yordamida eng so‘nggi texnologiyalar asosida barpo etilgan klubda barcha sharoitlar yaratilgan. Jumladan, ot sportining konkur turi va ko‘rgazmali chiqishlar bo‘yicha xalqaro musobaqalar o‘tkazishga mo‘ljallangan manej. Uning sathi to‘rt qoplamali bo‘lib, geoto‘r yotqizilgan, drenaj tizimi mavjud. Chigalyozdi mashqlari uchun maxsus maydon ham ko‘zda tutilgan. 150 o‘rinli tribunalar qurilgan. Musobaqaning nufuzli mehmonlarini kutib olish va bevosita klub bazasida joylashtirish imkoni mavjud.
— Klubimiz 2018-yilda tashkil etilgan bo‘lib, dastlab 5 ta otga ega bo‘lganmiz, — deydi klub boshlig‘i Bahromjon Madrahimov. — O‘tgan yil davomida yana yigirmata zotdor ot olib kelindi. Hozirda parvarishlanayotgan ayg‘ir va biyalar alohida seksiyalarga ajratilgan maxsus xonalarda saqlanadi. Otlar uchun cho‘milish havzasi va solyariy qurilgan. Musobaqalarga tayyorgarlik jarayonida otlar ushbu basseynda suzib, mashq qiladi. Solyariyda esa to‘rt tuyoqlilar ultrabinafsha nurlari ostida D vitaminiga to‘yinadi. Klubda sport murabbiylari va instruktorlar faoliyat olib borishmoqda.
Bahromjon Madrahimovning aytishicha, Prezidentning “O‘zbekiston Respublikasida yilqichilik va ot sportini yanada rivojlantirish chora-tadbirlari to‘g‘risida”gi qarori ijrosi doirasida ayni paytda klubda 5 nafar yosh chavandoz tarbiyalanmoqda. Yaqin orada qiziqish bildirayotgan yoshlarning yana uch nafari tanlovdan o‘tsa, klub safiga qo‘shilishi mumkin.
Klubning ochilish marosimida Andijon viloyati hokimi Shuhratbek Abdurahmonov ishtirok etib, mazkur inshoot viloyatda olimpiya turlariga kiruvchi ot sportini rivojlantirishga hissa qo‘shishiga umid bildirdi. Marosim ot sporti bo‘yicha O‘zbekiston ochiq chempionatiga ulanib ketdi.
Izoh (0)