G‘uzor hokimligi uyi yongan nogiron ayolga yordam berilganini yozyapti. Jabrlanuvchi esa tuman hokimligini yolg‘onchilikda ayblamoqda

“Daryo”da G‘uzorda “ZIL” haydovchisi aybi bilan uyi yongan nogiron ayol zarar qoplanmayotganidan shikoyat qilayotgani xususida maqola chop etilgandi. Hechdan ko‘ra kech deganlaridek oradan bir oydan ham ko‘p vaqt o‘tib, tuman hokimligi axborot xizmatining munosabati berildi.

Tuman hokimligi axborot xizmatining yozishicha, “ZIL” haydovchisi aybi bilan jabr ko‘rgan ayolga amaliy yordam berilgan. Zarar qoplangan.

— Mazkur masala yuzasidan yong‘in sodir bo‘lganidan keyin tuman hokimi boshchiligida ishchi guruh a’zolari fuqaro S.Zikrillayevaning xonadoniga borib, holatni o‘rgandi, — deyiladi hokimlik axborot xizmati ma’lumotnomasida. — Fuqaro Zikrillayeva Sofiyaga tuman hokimligi tomonidan 1,5 million so‘m moddiy yordam berilgan. Sug‘urta kompaniyasi tomonidan esa 4,2 million so‘m to‘lab berilgan.

Axborot xizmatining qo‘shimcha qilishicha, fuqaro tumandagi 12-sonli maktabda o‘qituvchi bo‘lib ishlaydi, o‘z mehnati bilan hurmat qozonganligini inobatga olib, maktab ma’muriyati tomonidan 1,2 million so‘m mablag‘ yordam qilingan.

“Mahalla” hayriya jamoat fondi tuman bo‘linmasi tomonidan ham 4,6 million so‘m moddiy yordam berilgani qayd etiladi.

Hokimlik axborot xizmatidan ma’lum qilishlaricha, “ZIL” haydovchisi ham 100 dona shifer, 50 dona stropila, 50 metr tunuka olib bergan.

— Hozirgi kunda Sofiya Zikrillayevaning yong‘indan zarar ko‘rgan binolari mahalla faollari va qishloq aholisi tomonidan hashar yo‘li bilan ta’mirlanmoqda, — deya yakunlanadi hokimlik ma’lumotnomasi.

Biz hokimlik munosabatini o‘qib, to‘g‘risi juda xursand bo‘ldik, albatta. Muammoga e’tibor qaratgan tuman hokimiga rahmat aytgimiz keldi. Murojaatchining quvonchiga sherik bo‘lishni istadik. Biroq...

— Tuman hokimligi tomonidan 1,5 million so‘m berilishi va “Mahalla” hayriya jamoat fondi tuman bo‘linmasi tomonidan ham 4,6 million so‘m moddiy yordam berilgani to‘g‘risidagi xabar yolg‘on, — deydi Sofiya Zikrillayeva. — Ulardan hech qanday yordam olganim yo‘q. Viloyat hokimiga rahmat, meni qo‘llab-quvvatlab, moddiy yordam berdi.

Sofiya Zikrillayevaning aytishicha, tuman hokimligining “fuqaroning yong‘indan zarar ko‘rgan binolari mahalla faollari va qishloq aholisi tomonidan hashar yo‘li bilan ta’mirlanyapti”, degan gapi ham yolg‘on. Uyni ta’mirlovchi va tom shiferini o‘rnatayotgan ustalarga Sofiya Zikrillayevaning o‘zi xizmat haqi to‘lagan.