Андижон вилоятининг Андижон туманида 10 миллиард сўмлик лойиҳа асосида «Horse king» йилқичилик ва от спорти клуби мажмуаси фойдаланишга топширилди. Бу ҳақда «Дарё» мухбири Умиджон Мамарасулов хабар бермоқда.
Замонавий мажмуа Храбек қишлоғидан ажратиб берилган 12 гектар майдонда жойлашган. Шундан 5 гектари бино ва спорт иншоотлари бўлса, 7 гектарида озиқа базаси учун беда етиштирилади.
Германиялик мутахассислар ёрдамида энг сўнгги технологиялар асосида барпо этилган клубда барча шароитлар яратилган. Жумладан, от спортининг конкур тури ва кўргазмали чиқишлар бўйича халқаро мусобақалар ўтказишга мўлжалланган манеж. Унинг сатҳи тўрт қопламали бўлиб, геотўр ётқизилган, дренаж тизими мавжуд. Чигалёзди машқлари учун махсус майдон ҳам кўзда тутилган. 150 ўринли трибуналар қурилган. Мусобақанинг нуфузли меҳмонларини кутиб олиш ва бевосита клуб базасида жойлаштириш имкони мавжуд.
— Клубимиз 2018 йилда ташкил этилган бўлиб, дастлаб 5 та отга эга бўлганмиз, — дейди клуб бошлиғи Баҳромжон Мадраҳимов. — Ўтган йил давомида яна йигирмата зотдор от олиб келинди. Ҳозирда парваришланаётган айғир ва биялар алоҳида сексияларга ажратилган махсус хоналарда сақланади. Отлар учун чўмилиш ҳавзаси ва солярий қурилган. Мусобақаларга тайёргарлик жараёнида отлар ушбу бассейнда сузиб, машқ қилади. Солярийда эса тўрт туёқлилар ултрабинафша нурлари остида Д витаминига тўйинади. Клубда спорт мураббийлари ва инструкторлар фаолият олиб боришмоқда.
Баҳромжон Мадраҳимовнинг айтишича, Президентнинг «Ўзбекистон Республикасида йилқичилик ва от спортини янада ривожлантириш чора-тадбирлари тўғрисида»ги қарори ижроси доирасида айни пайтда клубда 5 нафар ёш чавандоз тарбияланмоқда. Яқин орада қизиқиш билдираётган ёшларнинг яна уч нафари танловдан ўтса, клуб сафига қўшилиши мумкин.
Клубнинг очилиш маросимида Андижон вилояти ҳокими Шуҳратбек Абдураҳмонов иштирок этиб, мазкур иншоот вилоятда олимпия турларига кирувчи от спортини ривожлантиришга ҳисса қўшишига умид билдирди. Маросим от спорти бўйича Ўзбекистон очиқ чемпионатига уланиб кетди.
Изоҳ (0)