Toshkent shahar hokimining iqtisodiyot va tadbirkorlik masalalari bo‘yicha o‘rinbosari Hotambek Shokirov mahalliy kompaniyalarni ochish va taksi haydovchilari faoliyatini qonuniylashtirish yo‘lida O‘zbekiston hududida Rossiyaning “Yandeks.Taksi” agregatorini yopish taklifi bilan chiqdi. Hokim o‘rinbosari bu haqda Toshkent shahar deputatlari kengashining 58-sessiyasidagi hisobotida ushbu masalani o‘rtaga tashladi, deb yozmoqda Repost.
“Yandeks.Taksi”, Millenium va boshqa ilovalarni yopish kerak.
Bugungi kunda butun respublika bo‘ylab 50 mingga yaqin, Toshkent shahrining o‘zida 10 mingdan ortiq fuqarolar noqonuniy ravishda yo‘lovchi tashish bilan shug‘ullanib keladi. “Yandeks.Taksi”, Millenium va boshqa ilovalar orqali taksi xizmatlari ko‘rsatilayotgani hammaga ma’lum. Bugun aynan shu ilova orqali xizmat ko‘rsatish ham noqonuniy faoliyatga kiradi. Amaldagi qonunchilikka asoslanib ushbu ilovalarning respublika hududidagi faoliyatini tugatish va ularni yopish zarur. Bu hali ham ochiq qolayotgan muammolardan biri.“Yandeks.Taksi” serverlari xorijda joylashgan.
Bugun jamoatchilik oldida taksi mobil agregatorlari faoliyatini to‘xtatmaslik, balki ularni qonuniylashtirish kerak degan fikr paydo bo‘lgan. Ularni qonuniylashtirish uchun bir necha talablarni bajarish lozim:— Birinchidan, “Yandeks.Taksi” serverlari xorijda joylashgan. Fuqarolarimizning shaxsiy ma’lumotlari, taksida kimning qayerga borayotganini xorijdagi kimsalar kuzatib turadi. Shu sababli serverlarni Toshkentga ko‘chirish kerak.— Ikkinchidan, ilovadan foydalanayotgan haydovchilarga mashina hamda yo‘lovchi tashish uchun litsenziyalarni ijaraga berish lozim.Yangi milliy taksi-agregatlarining qay tartibda faoliyat yuritishi va o‘ziga xosliklari.
Biz “Yandeks.Taksi”ga o‘xshash o‘zbek milliy agregatini yaratish g‘oyasini ilgari surdik. Agar ushbu tashabbus qonunchilikda o‘z aksini topsa, uni qo‘llab-quvvatlovchilar va bundan yutadiganlar soni ko‘payadi. Haydovchi ijrochi emas ishtirokchiga aylanadi. A’zolikka qabul qilingandan keyin avtomobil texnik ko‘rikdan o‘tkaziladi. Mashinaning ishlab chiqarilgan yili, modeli va holati hisobga olinadi. Agar haydovchi sinovlarda o‘ta olsa, u ilovaning foydalanuvchisi bo‘ladi. Mashinani sariq rangga bo‘yamaydi, shunchaki etiketkani yopishtirib oladi. Shundan so‘ng uning mobil ilovasi dasturga ulanadi.Yo‘lovchilar sog‘lig‘i va xavfsizligini ta’minlash haqida.
Taksi haydovchilari sog‘lig‘ini nazorat qilish va xavfsizlik muammosini hal etish bu borada texnik yechim talab qiladi. AYoQShlarda IP-kameralar o‘rnatish lozim. Haydovchi har kuni tongda ishga chiqishdan oldin kamera oldiga keladi va ko‘z qorachig‘ini skanerdan o‘tkazadi. So‘ngra “Boshlash” tugmasini bosadi, tizim haydovchining shaxsini tekshiruvdan o‘tkazadi. Tizim yordamida uning qon bosimi haqida ma’lumotlarni olish va haydovchining holati haqida 80 foizgacha aniq ma’lumot berishi mumkin. Agar hammasi joyida bo‘lsa, u ishga chiqishi mumkin.Tashabbuslar amalga oshirilsa, davlat budjetiga 430 milliard so‘m miqdorida soliqlar kelib tushadi.Hotambek Shokirov, Toshkent shahar hokimining iqtisodiyot va tadbirkorlikmasalalari bo‘yicha birinchi o‘rinbosari
Hotambek Shokirov 1970-yilda tug‘ilgan. U ko‘p yillar davomida Davlat Soliq qo‘mitasida turli lavozimlarda ishlagan. 2018-yil dekabrgacha Davlat Soliq qo‘mitasida rais o‘rinbosari lavozimida faoliyat yuritgan. 2019-yil may oyida Toshkent shahar hokimining iqtisodiyot va tadbirkorlik masalalari bo‘yicha birinchi o‘rinbosari lavozimiga tayinlangan.
Izoh (0)