Toshkentning Sergeli tumanida 2 ta davlat maktabgacha ta’lim tashkilotining ochilish marosimi bo‘lib o‘tdi. Maktabgacha ta’lim tashkilotlarining umumiy quvvati 840 nafar bolani tashkil etadi. Bu haqda “Daryo”ga Maktabgacha ta’lim vazirligi matbuot xizmati ma’lum qildi.
Yangi maktabgacha ta’lim tashkilotlari Sergeli tumanining Qumariq turar joy mavzesida va 5A dahasida joylashgan. Ular mebel, rivojlantiruvchi o‘yin va o‘yinchoqlar bilan jihozlangan.
Yangi MTTlar orqali Sergeli tumanida maktabgacha ta’lim bilan qamrab olish hajmi 83 foizdan 89 foizgacha oshiriladi va 100 kishi uchun qo‘shimcha ish joylari yaratiladi.
“So‘nggi yillarda Sergeli tumani jadal rivojlanib bormoqda, yangi qurilgan uylarga yashovchilar ko‘chib kirmoqda. Shu bilan birga, ta’lim muassasalariga bo‘lgan ehtiyoj ortib bormoqda. Bir yo‘la ikkita MTT ochilishi yana 600 nafar bola sifatli maktabgacha ta’lim olish imkoniyatiga ega bo‘lishini anglatadi. Shuningdek, qisqa muddatli guruhlar ochilib, ularga 240 nafar bola qabul qilinadi.
Yangi maktabgacha ta’lim tashkilotlari qurilishida standart loyihalardan voz kechilgan holda noodatiy dizayn va zamonaviy yechimlardan foydalanildi. Har bir detal ustida puxta o‘ylab chiqish orqali biz bolalarimiz uchun mumkin qadar qulay o‘quv-o‘yin muhitini yaratib bermoqdamiz”, — deydi Maktabgacha ta’lim vaziri Agrippina Shin.
Ta’lim muhiti Koreya Respublikasining modeli negizida loyihalashtirildi. Yirik javonlar o‘rniga mobil modullar o‘rnatildi. Ular maydonni o‘zgartirish va uni turli mashg‘ulotlarga moslashtirish imkonini beradi. O‘yin va o‘quv qurollari bolalar bo‘yi yetadigan joyda joylashgan bo‘lib, o‘yinlarning aksariyati barmoqlarning mayda motorikasini rivojlantirish uchun mo‘ljallangan. Guruhlar va koridorlarda nutq va yozish, bilimni rivojlantirish, ijod, qurilish, konstruksiyalash va matematika, syujet o‘yinlari, kutubxona kabi ko‘plab rivojlantirish markazlari joylashgan. Bolalarning o‘zi ko‘ngliga yoqqan mashg‘ulotni tanlaydi, pedagog esa o‘yin va o‘qish uchun zarur bo‘lgan materiallarni aniqlaydi va qiyinchilik yuzaga kelgan holda ularga yordam beradi.
Davlat rahbarining beshta tashabbusini amalga oshirish doirasida sog‘lomlashtirish va badiiy mashg‘ulotlarga alohida e’tibor qaratilmoqda: an’anaviy musiqa va raqslardan tashqari bolalar sport bilan shug‘ullanishi, o‘yin shaklida chet tillarini o‘rganishi hamda boshqa rivojlantiruvchi to‘garak va seksiyalarga qatnashishi mumkin bo‘ladi.
Ushbu maktabgacha ta’lim tashkilotlariga qatnash uchun bir oylik to‘lov bir bola uchun 186 ming so‘mni, ikki nafar bola uchun 132 ming so‘mni tashkil etadi. Shuningdek, qonunchilikka muvofiq, tarbiyalanuvchilar umumiy sonining 15 foizi MTTga bepul qatnashi mumkin bo‘ladi. Ushbu imtiyoz kam ta’minlangan oilalardagi bolalarga nisbatan taqdim etiladi.
Izoh (0)