18-sentabr, chorshanba kuni soat 20:04 da Shayxontohur tumani Beshqayrag‘och ko‘chasi 2-uyda joylashgan “Ko‘kcha tekstil” MChJga qarashli tekstil mahsulotlarini ishlab chiqarish sexida yong‘in sodir bo‘layotganligi haqida Toshkent shahar yong‘in-qutqaruv xizmatiga xabar kelib tushgan, deb xabar beradi FVV YoXBB OAV bilan hamkorlik qilish bo‘linmasi.
Xabar asosida yong‘inni bartaraf etilishiga 14 ta asosiy va 7 ta maxsus yong‘in o‘chirish bo‘linmasi jalb etilgan. Birinchi bo‘linmalar voqea joyiga 5 daqiqada yetib borganda, “Ko‘kcha tekstil” MChJga qarashli qayta ta’mirlash (rekonstruksiya) ishlari olib borilayotgan ishlab chiqarish sexning ichki qismi quyuq qora tutun bilan qoplangan holda ochiq alanga bilan yonayotganligi ma’lum bo‘lgan. Yong‘in soat 21:26 da o‘rab olinib, 23:11 da bartaraf etilgan. Ko‘rilgan tezkor harakatlar natijasida yong‘indan sexning 67490 kvadrat metr maydoni saqlab qolingan.
Tan jarohati olganlar va halok bo‘lganlar qayd etilmagan. Yong‘in oqibatida ishlab chiqarish sexining 2200 kvadrat metr maydonida ichki qismi va jihozlari yonib zararlangan. Yong‘in sababi elektr payvandlash va kesish ishlarini olib borishda yong‘in xavfsizligi qoida talablari buzilishidan, deb taxmin qilindi. Moddiy zarar miqdori aniqlanmoqda.
Izoh (0)