SSV: “Tez yordam”ga tushayotgan murojaatlarning 30 foizdan ko‘prog‘i asossiz
Tez tibbiy yordam kechikishi sabablaridan biri asossiz chaqiruvlardir, deb xabar beradi Sog‘liqni saqlash vazirligi Jamotchilik bilan aloqalar bo‘limi.
“Bugungi kunda “tez yordam”ga tushayotgan murojaatlarning 30 foizdan ko‘prog‘ini ana shunday asossiz chaqiriqlar tashkil etadi. Xo‘sh, bu murojaatchilar kimlar, degan savol tug‘ilishi tabiiy. Bularning aksariyati surunkali kasalligi bor bemorlardir. Poytaxtimizdagi ‘tez yordam’ xizmatiga ularning ba’zilari yiliga 500 martadan hatto 1000 martagacha murojaat qiladi”, — deydi Shoshilinch va tez tibbiy yordam masalalari bo‘yicha mahalliy koordinator Obidjon Dilmurodov.
Toshkent shahar tez tibbiy yordam stansiyasi bosh shifokor o‘rinbosari Ilhom Aslonovning ta’kidlashicha, surunkali kasalliklarni davolash “tez yordam” shifokorlarining vazifasi hisoblanmaydi.
“ ‘Tez yordam’ shifokori kasallikning hayot uchun xavf solishi mumkin bo‘lgan belgilarini bartaraf etadi, xolos. Bu bemorga vaqtincha yengillik beradi. Bemor darddan to‘la xalos bo‘lishi uchun umumiy amaliyot shifokori nazoratida turib yoki shifoxonada yotib davolanishi kerak.
Ana shunday asossiz chaqiriqlar tufayli ‘tez yordam’ xizmatida tig‘izlik yuzaga keladi. Natijada shoshilinch tibbiy yordamga haqiqatan muhtoj bo‘lgan bemorlarga o‘z vaqtida yetib borish imkoniyati cheklanmoqda”, — deydi Ilhom Arslonov.
Qayd etilishicha, “tez yordam”ni dori-darmon va tibbiy buyumlar bilan ta’minlash so‘nggi uch yil ichida 5,2 barobarga ko‘paydi. Bugungi kunda har 13 ming nafar aholiga bitta “tez yordam” mashinasi to‘g‘ri keladi. Bu xalqaro standartlarga to‘la mosdir.
