O‘zbekistonda necha nafar qiz 17 yoshgacha ona bo‘lgani hisoblab chiqildi

2019-yilda 17 yoshgacha qizlar o‘rtasida 50 ta erta tug‘ruq holati qayd etilgan. Bu haqda O‘zbekiston Oliy Majlisi Senatida o‘tkazilgan Yoshlar, madaniyat va sport masalalari qo‘mitasi majlisida ma’lum qilindi, deb yozadi O‘zA.

Shuningdek, 6 mingdan ortiq yosh oilalar ajrimi qayd etilgan.

“Yoshlarni tarbiyalashda oilaning o‘rni susayib borayotgani, yosh yigit-qizlar oila qurish, erta nikoh haqida umuman tushunchaga ega emasligini bunga sabab deyish mumkin”, — deyiladi xabarda.

Qayd etilishicha, qo‘mita yig‘ilishida yoshlar orasida huquqbuzarliklarning oldini olish masalalari ham muhokama qilingan.

“Yoshlar orasida huquqbuzarliklarning oldini olishda asosiy omil — ularning samarali bandligini ta’minlash borasida ham qator kamchiliklar mavjud. Yoshlarni munosib ish bilan ta’minlash, jumladan, ular uchun barqaror hamda istiqbolli ish o‘rinlarini yaratish, yoshlarning mehnatga oid huquqlariga ish beruvchilar tomonidan rioya etilishi ustidan qat’iy nazoratni yo‘lga qo‘yish taqozo etiladi. Zotan, har yili mamlakat mehnat bozoriga ta’lim muassasalarini tamomlagan qariyb 450 ming yosh o‘g‘il-qiz kirib kelmoqda”, — deyiladi xabarda.