Samarqand viloyati Paxtachi tumanida yashovchi ayol MIB xodimining qonuniy xatti-harakatlariga to‘sqinlik qilib, uni tayoq bilan urdi. Bu haqda Bosh prokuratura matbuot xizmati xabar berdi.
13-sentabr, juma kuni soat 10:00 da MIB Paxtachi tumani bo‘limi xodimlari hududda joylashgan xususiy korxonaga o‘zboshimchalik bilan elektr tarmog‘iga ulanib olganligi holatini tekshirish maqsadida borgan.
Ammo 1991-yilda tug‘ilgan N.R. ismli ayol MIB xodimlarining faoliyatiga qarshilik ko‘rsatib, ularni haqorat qilib, tayoq bilan B.U.ning tanasining turli qismlariga urib, shuningdek, F.X.ning qo‘lidan dalolatnomani tortib olib, ularni yirtib, yoqib yuborgan.
Mazkur holat yuzasidan tuman prokuraturasi tomonidan N.R.ga nisbatan JKning 140-moddasi (haqorat qilish) 3-qismi “a” bandi, 219-moddasi 2-qismi va 227-moddasi 1-qismi bilan jinoyat ishi qo‘zg‘atilgan.
Tergov harakatlari davom etmoqda.
Izoh (0)