Toshkent shahar hokimi Jahongir Ortiqxo‘jayev Anqara shahri hokimi Mansur Yavash boshchiligidagi delegatsiyani qabul qildi. O‘zaro muloqot davomida ikki tomonlama munosabatlarning bugungi holati va istiqbollari muhokama qilindi, deb xabar beradi poytaxt hokimligi matbuot xizmati.
Toshkent shahar hokimi oxirgi uch yilda O‘zbekiston va Turkiya munosabatlarida yangi davr kuzatilayotganligini qayd etdi. Xususan, O‘zbekiston Respublikasi Prezidentining Turkiyaga tashrifi davomida 30 dan ortiq loyihalarni amalga oshirish borasida 3,5 milliard dollar hajmidagi bitimlar imzolanganligi hamda hozirda qator sohalardagi aloqalar rivojlanib borayotganligini ta’kidlab o‘tdi.
Anqara shahri hokimi Toshkent shahar hokimi va hokimlik vakillariga samimiy va do‘stona mehmonnavozlik uchun minnatdorlik bildirib, ikki davlat va ikki shahar o‘rtasidagi munosabatlarning taraqqiy etishi o‘zaro manfaatli ekanligini aytib o‘tdi. Savdo-iqtisodiy va investitsiya aloqalari kengayib borayotganligiga e’tibor qaratib, hozirda O‘zbekistonda 500 ga yaqin turk firma va kompaniyalari faoliyat yuritayotgani, o‘zaro savdo aylanmasi ikki milliard AQSh dollariga yetganligini aytib o‘tdi.
“16-sentabr Toshkent va Anqara munosabatlari tarixida unutilmas kun sifatida muhrlandi. Ikki shahar hokimlari qardoshlik, o‘zaro hamjihatlik va hamkorlikni yanada yangi pog‘onaga olib chiqishga xizmat qiluvchi muhim hujjat ‘Birodarlashuv aloqalarini o‘rnatganlik haqida’gi memorandumni imzoladi.
Toshkent shahar hokimi bu hujjat azaldan do‘st va hamfikr bo‘lgan ikki davlat, ikki shahar o‘rtasidagi aloqalar istiqbolida nihoyatda ahamiyatli ekanligini, iqtisodiyot, sanoat, shaharsozlik, san’at, madaniyat va turizm sohalaridagi hamkorlikni mustahkamlash va kengaytirishga xizmat qilishini ta’kidladi”, — deyiladi xabarda.
Mansur Yavash ayni paytda Anqarada O‘zbekiston nomli 3 ta, Toshkent deb yuritiluvchi 12 ta, Samarqand nomli 8 ta va Buxoro deb ataluvchi 11 ta ko‘cha borligini aytib, o‘zaro do‘stlik va birodarlik timsoli sifatida Toshkentdagi ko‘chalarning birini “Anqara” deb nomlashni taklif etdi. Shuningdek, hamkorlikka oid boshqa takliflarni bildirdi.
Anqara shahar hokimi Mansur Yavvash boshchiligidagi delegatsiya a’zolari Toshkentning diqqatga sazovor joylarida bo‘lib, poytaxt tarixi, taraqqiyoti va bugungi kuni bilan tanishdi.
Izoh (0)