Toshkent shahar IIBB YHXB xodimlari tomonidan olib borilayotgan profilaktik ishlar asta-sekinlik bilan natija bermoqda, deb xabar beradi poytaxt IIBB matbuot xizmati.
“Misol uchun, joriy yilning yoz faslida olib borilgan ishlar davomida poytaxtda trotuarlarda harakatlanish yoki to‘xtash va to‘xtab turish qoidalarini buzish kabi piyodalar huquqlarini mensimaslik holatlari sezilarli darajada kamaydi. Ammo yo‘l harakati qoidalari buzilishi profilaktikasi yo‘nalishidagi ishlar hali ko‘p”, — deyiladi xabarda.
2019-yilning 9-sentabr kunidan 15-sentabrgacha bo‘lgan davr ichida IIBB YHXB YPX inspektorlari tomonidan Yo‘l harakati qoidalari buzilganligi bilan bog‘liq 14 807 ta faktni qayd etdi, shulardan 1 883 tasi — qo‘pol tarzdagi qoidabuzarliklardir.
“O‘tgan hafta davomida yo‘l belgilarini mensimaslik bilan bog‘liq 2 411 ta holat va yo‘l chizmalarini mensimaslik bilan bog‘liq 1 573 ta holat qayd etildi. Bu esa o‘z navbatida yo‘l harakatining boshqa ishtirokchilari huquqlarini hurmat qilmaslikning va to‘qnashuvlar ehtimolini oshirishning to‘g‘ridan to‘g‘ri dalilidir.
Hurmatli haydovchi va piyodalar! Yo‘llardagi xulq-atvorimiz bizning kamchiligimiz emas, balki faxrimizga aylanishi zarur. Qoidalarga rioya qilish sog‘liq va hayotni asrashga sabab bo‘ladi. Yo‘l harakati qoidalari — bu faqatgina svetoforning taqiqlovchi signali haqidagi ma’lumot emas, o‘zingiz amin bo‘ling”, — deyiladi xabarda.
Izoh (0)