Senatda 9-sentabr kuni Oliy Majlis Senati raisining birinchi o‘rinbosari Sodiq Safoyevning Norvegiya TIVning maxsus elchisi Knut Vollebek bilan uchrashuvi bo‘lib o‘tdi.
Uchrashuvda O‘zbekiston delegatsiyasining 2019-yil iyun oyida Norvegiyaga amalga oshirgan tashrifi chog‘ida erishilgan kelishuvlarni ro‘yobga chiqarish masalalari muhokama etildi. Parlamentlararo aloqalarni mustahkamlash va ikki tomonlama o‘zaro hamkorlikni rivojlantirish muhimligi ta’kidlandi.
Norvegiya tomoni O‘zbekistonning Markaziy Osiyoda xavfsizlikni mustahkamlashga qo‘shayotgan hissasini yuqori baholadi. Norvegiya O‘zbekiston bilan har tomonlama munosabatlarni faollashtirishdan manfaatdorligi va yaqin orada yuksak darajadagi delegatsiyani respublikaga yuborish rejalashtirayotgani ta’kidlandi. Xususan, Norvegiya TIV rahbari Ine Soreydening O‘zbekistonga tashrifini tashkil etish bo‘yicha ishlar borasida so‘z yuritildi.
Shuningdek, uchrashuvda Orolbo‘yi bo‘yicha ko‘p sheriklik asosidagi trast fondi doirasida hamkorlik qilish va uning faoliyatini qo‘llab-quvvatlashni donor davlatlar va xayriya tashkilotlari orasida birgalikda targ‘ib qilish bo‘yicha hamkorlik masalalari ham muhokama etildi.
10-sentabr kuni esa Knut Vollebek O‘zbekiston Tashqi ishlar vaziri Abdulaziz Komilov bilan uchrashdi. Suhbatda ikki va ko‘p tomonlama shakldagi hamkorlik masalalari muhokama qilindi.
O‘zbekiston va Norvegiya turli sohalarda, jumladan, BMT doirasida o‘zaro manfaatli munosabatlarni rivojlantirish tarafdori ekani ta‘kidlandi. Shu o‘rinda uchrashuvda Norvegiya hukumatiga BMT shafeligida Orolbo‘yi mintaqasi uchun Inson xavfsizligi bo‘yicha ko‘p tomonlama sheriklik asosida Trast fondini yaratish bo‘yicha Shavkat Mirziyoyev tashabbusini qo‘llab-quvvatlagani va ushbu fondga moliyaviy mablag‘ ajratgani uchun minnatdorchilik bildirildi.
Savdo-iqtisodiy va investitsion aloqalarni rivojlantirish ikki tomonlama hamkorlikning ustuvor yo‘nalishlaridan biri bo‘lishi mumkinligi qayd etildi. Hozirgi vaqtda ushbu sohadagi ko‘rsatkichlar yirik salohiyat mavjudligidan dalolat beradi. Shu sababli iqtisodiy hamkorlikni muvofiqlashtiruvchi O‘zbekiston—Norvegiya institutini yaratish taklifi bildirildi.
Shuningdek, ilm-fan, madaniyat, ta’lim va kadrlar tayyorlash sohalaridagi hamkorlikning dolzarb jihatlari ham ko‘rib chiqildi.
Izoh (0)