Сенатда 9 сентябрь куни Олий Мажлис Сенати раисининг биринчи ўринбосари Содиқ Сафоевнинг Норвегия ТИВнинг махсус элчиси Кнут Воллебек билан учрашуви бўлиб ўтди.
Учрашувда Ўзбекистон делегациясининг 2019 йил июнь ойида Норвегияга амалга оширган ташрифи чоғида эришилган келишувларни рўёбга чиқариш масалалари муҳокама этилди. Парламентлараро алоқаларни мустаҳкамлаш ва икки томонлама ўзаро ҳамкорликни ривожлантириш муҳимлиги таъкидланди.
Норвегия томони Ўзбекистоннинг Марказий Осиёда хавфсизликни мустаҳкамлашга қўшаётган ҳиссасини юқори баҳолади. Норвегия Ўзбекистон билан ҳар томонлама муносабатларни фаоллаштиришдан манфаатдорлиги ва яқин орада юксак даражадаги делегацияни республикага юбориш режалаштираётгани таъкидланди. Хусусан, Норвегия ТИВ раҳбари Ине Сорейденинг Ўзбекистонга ташрифини ташкил этиш бўйича ишлар борасида сўз юритилди.
Шунингдек, учрашувда Оролбўйи бўйича кўп шериклик асосидаги траст фонди доирасида ҳамкорлик қилиш ва унинг фаолиятини қўллаб-қувватлашни донор давлатлар ва хайрия ташкилотлари орасида биргаликда тарғиб қилиш бўйича ҳамкорлик масалалари ҳам муҳокама этилди.
10 сентябрь куни эса Кнут Воллебек Ўзбекистон Ташқи ишлар вазири Абдулазиз Комилов билан учрашди. Суҳбатда икки ва кўп томонлама шаклдаги ҳамкорлик масалалари муҳокама қилинди.
Ўзбекистон ва Норвегия турли соҳаларда, жумладан, БМТ доирасида ўзаро манфаатли муносабатларни ривожлантириш тарафдори экани таъкидланди. Шу ўринда учрашувда Норвегия ҳукуматига БМТ шафелигида Оролбўйи минтақаси учун Инсон хавфсизлиги бўйича кўп томонлама шериклик асосида Траст фондини яратиш бўйича Шавкат Мирзиёев ташаббусини қўллаб-қувватлагани ва ушбу фондга молиявий маблағ ажратгани учун миннатдорчилик билдирилди.
Савдо-иқтисодий ва инвестицион алоқаларни ривожлантириш икки томонлама ҳамкорликнинг устувор йўналишларидан бири бўлиши мумкинлиги қайд этилди. Ҳозирги вақтда ушбу соҳадаги кўрсаткичлар йирик салоҳият мавжудлигидан далолат беради. Шу сабабли иқтисодий ҳамкорликни мувофиқлаштирувчи Ўзбекистон—Норвегия институтини яратиш таклифи билдирилди.
Шунингдек, илм-фан, маданият, таълим ва кадрлар тайёрлаш соҳаларидаги ҳамкорликнинг долзарб жиҳатлари ҳам кўриб чиқилди.
Изоҳ (0)