Andijon viloyati Asaka tuman tibbiyot birlashmasining tez tibbiy yordam bo‘limiga qarashli “Sharq haqiqati” shoxobchasiga 6-sentabr kuni soat taxminan 20:00 da og‘ir jarohat olgan bemor olib kelingan. Dastlabki ma’lumotlarga qaraganda, shifokorlar bemorga zudlik bilan birinchi yordamni ko‘rsatgan.
Tibbiy ko‘rik paytida bemorga o‘zgalar tomonidan tan jarohati yetkazilganiga ishonch hosil qilgan tibbiyot xodimlari xizmat vazifasidan kelib chiqqan holda, tuman IIBga xabar bermoqchi bo‘lganida, bemorni olib kelgan fuqaro S.N. tez tibbiy yordam feldsheri B.Gadoyevning burniga boshi bilan zarba bergan va kaltaklay boshlagan.
Bundan tashqari, u shifokorni kaltaklash bilan qanoatlanmay hovlida turgan tez tibbiy yordam avtomashinasiga ham ziyon yetkazgan. Ushbu holat haqida tuman IIBga xabar berilganidan so‘ng ma’lum vaqt o‘tib ichki ishlar xodimlari voqea joyiga yetib kelgan. Jarohat olgan feldsher esa tuman shoshilinch tibbiy yordam bo‘limiga olib borilgan.
Bo‘limda unga “Burun suyagi yopiq sinishi. Chap tirsak, tizza bo‘g‘imining yumshoq to‘qimalari lat yeyishi. Pastki jag‘ chap sohasining yirtilishi va yumshoq to‘qimalarining lat yeyishi” tashxisi bilan shoshilinch tibbiy yordam ko‘rsatilgan. Hozirgi vaqtda B.Gadoyev Asaka tuman shoshilinch tibbiy yordam bo‘limida davolanmoqda.
“Ayni paytda huquqni muhofaza qiluvchi organlar tomonidan tergovoldi surishtiruv ishlari olib borilmoqda”, — deya xabar bermoqda Sog‘liqni saqlash vazirligi.
Izoh (0)