Андижон вилояти Асака туман тиббиёт бирлашмасининг тез тиббий ёрдам бўлимига қарашли «Шарқ ҳақиқати» шохобчасига 6 сентябрь куни соат тахминан 20:00 да оғир жароҳат олган бемор олиб келинган. Дастлабки маълумотларга қараганда, шифокорлар беморга зудлик билан биринчи ёрдамни кўрсатган.
Тиббий кўрик пайтида беморга ўзгалар томонидан тан жароҳати етказилганига ишонч ҳосил қилган тиббиёт ходимлари хизмат вазифасидан келиб чиққан ҳолда, туман ИИБга хабар бермоқчи бўлганида, беморни олиб келган фуқаро С.Н. тез тиббий ёрдам фелдшери Б.Гадоевнинг бурнига боши билан зарба берган ва калтаклай бошлаган.
Бундан ташқари, у шифокорни калтаклаш билан қаноатланмай ҳовлида турган тез тиббий ёрдам автомашинасига ҳам зиён етказган. Ушбу ҳолат ҳақида туман ИИБга хабар берилганидан сўнг маълум вақт ўтиб ички ишлар ходимлари воқеа жойига етиб келган. Жароҳат олган фелдшер эса туман шошилинч тиббий ёрдам бўлимига олиб борилган.
Бўлимда унга «Бурун суяги ёпиқ синиши. Чап тирсак, тизза бўғимининг юмшоқ тўқималари лат ейиши. Пастки жағ чап соҳасининг йиртилиши ва юмшоқ тўқималарининг лат ейиши» ташхиси билан шошилинч тиббий ёрдам кўрсатилган. Ҳозирги вақтда Б.Гадоев Асака туман шошилинч тиббий ёрдам бўлимида даволанмоқда.
«Айни пайтда ҳуқуқни муҳофаза қилувчи органлар томонидан терговолди суриштирув ишлари олиб борилмоқда», — дея хабар бермоқда Соғлиқни сақлаш вазирлиги.
Изоҳ (0)