Qashqadaryo viloyatidagi 1-son asab-ruhiy kasalliklar dispanseri 260 o‘ringa mo‘ljallangan bo‘lsa-da, bemorlar soni haddan ziyod ortib ketgan. Shu boisdan ham 4 kishiga mo‘ljallangan xonalarda 8 nafar bemor yotib davolanmoqda.
Bundan avvalroq “Daryo” nashrida qashqadaryolik jurnalistga viloyatdagi 1-son asab-ruhiy kasalliklar shifoxonasi xodimlari tomonidan kuch ishlatilgani xususida maqola chop etilgandi. Maqolada ushbu shifoxonada tasvirga olingani taxmin qilingan video ham tarqatildi. “Daryo” muxbiri ushbu vidoega aniqlik kiritish maqsadida dispanserda bo‘ldi.
Bosh shifokor G‘ayrat Murodovning ma’lumot berishicha, shifoxonada 7 ta bo‘lim mavjud bo‘lib, dispanser 260 o‘ringa mo‘ljallangan. Ammo bugungi kunda dispanserda bemorlar soni haddan ziyod ortib ketgan.
Kuzatuvlarimizga ko‘ra, 3-bo‘limda 4 kishiga mo‘ljallangan xonalarda 8 kishi yotib davolanmoqda. Shu boisdanmi, koridorlarda yotgan bemorlarga ham ko‘zimiz tushdi.
— Bundan 20 yil ilgari viloyatda 600 o‘ringa mo‘ljallab tashkil etilgan asab-ruhiy kasalliklar shifoxonalari hozir ham shunday ahvolda, holbuki viloyatda o‘tgan 20 yil davomida aholi soni qanchalik o‘sgani o‘zingizga ma’lum, — deydi dispanser bosh shifokori G‘ayrat Murodov. — Bu muammo birgina bizning viloyatimizda emas, barcha viloyatlarda ham shu ahvol. Shuning uchun ham masala Oliy Majlis Senatida ko‘rib chiqilmoqda.
Internetda tarqalgan videodagi holatlar dispanserning 3-bo‘limidagi manzaraga yaqin bo‘lgani bois, bo‘lim boshlig‘i Nurilla Aralovni suhbatga chorladik. Ammo bo‘lim boshlig‘i video shu bo‘limdan olingan degan taxminni tamoman rad etdi.
— Videodagi holatlar nafaqat bizning bo‘lim, shifoxonamizda ham yo‘q, — deydi Nurilla Aralov. — Shuning uchun internetda tarqalgan videolar bizning shifoxonada bo‘lgan degan qarash noto‘g‘ri. To‘g‘ri, bizda bemorlar soni ko‘p. Biroq karavotlar yetarli darajada. Bemorlar yerda yotmaydi.
Internetda shov-shuvlarga sabab bo‘layotgan videoda aytilishicha, bo‘limning 60-70 nafar bemori ahvoli achinarli holatdagi hojatxonadan foydalanadi. Usti ochiq hovuzdan suv ichadi.
Kuzatuvlarimizdan ma’lum bo‘lishicha, xuddi shunday hojatxona va usti ochiq hovuz 3-bo‘limda joylashgan. Ahvoli qoniqarsiz hojatxona yonidan yangi hojatxona qurilishi boshlanganligiga qaraganda, ushbu holatlar bartaraf etilishi mo‘ljallangan.
Dispanser bosh shifokori G‘ayrat Murodov “Daryo” muxbiri bilan suhbati davomida qashqadaryolik jurnalistning 18 ta yangi karavot olib kelingani haqida yozgan gapi haqiqatga to‘g‘ri kelmasligini aytmoqda. Bosh shifokorning aytishicha, shifoxonada bemorlar uchun karavotlar yetarli darajada, hatto ortig‘i bilan bor.
Ma’lum bo‘lishicha, qashqadaryolik jurnalist dastlabki videoni tarqatgach viloyat Sog‘liqni saqlash boshqarmasi boshlig‘i Doniyor Tursunov, uning o‘rinbosari va viloyat prokuraturasi vakili kelib shifoxona holatini o‘rgangan. Ammo holat tasdig‘ini topmagan.
G‘ayrat Murodov shifoxona barcha OAV vakillari uchun ochiq ekanligi, holatni o‘rganmoqchi bo‘lgan har bir jurnalistni shart-sharoitlar bilan tanishtirishga tayyorligini bildirmoqda.
— To‘g‘ri, kamchiliksiz joyning o‘zi yo‘q, kamchilik bizda ham bor, — deydi G‘ayrat Murodov. — O‘sha videodagi holatlar bizda umuman yo‘q deb bo‘lmaydi. Shuning uchun ham o‘sha kamchiliklarni bartaraf etish harakatidamiz.
Izoh (0)