AQSh Vakillar palatasining sud ishlari bo‘yicha qo‘mitasi prezident Donald Trampning sukut saqlash evaziga u bilan aloqada bo‘lgan ayollarga pul berilishi bilan bog‘liq ishga daxldorligini tekshirishi mumkin. Bu haqda The Washington Post xabar berdi.
“RBK”ning yozishicha, qo‘mita 2016-yilda pornoaktrisa Stormi Deniyels va Playboy sobiq modeli Karen Makdugalga pul to‘lashga jalb etilgan guvohlarni so‘roq qilishni rejalashtirmoqda.
Vakillar palatasidan bo‘lgan demokratlar hozirda Trampni bu voqeaning ishtirokchisi sifatida tan olish uchun yetarli dalillar bor deb hisoblamoqda.
Trampning 2006—2008-yillarda shaxsiy huquqshunosi bo‘lgan Maykl Koen saylovoldi kampaniyasini moliyalashtirish qoidalarini buzish va kongressga yolg‘on ko‘rsatma berishda ayblanib, 2018-yil dekabrida 3 yilga ozodlikdan mahrum etilgan.
U 2016-yilda Deniels va Makdugalga Tramp bilan ishqiy munosabatlari haqida sukut saqlash uchun to‘lovlarni tashkil qilganini tan olgan. Huquqshunosning so‘zlariga ko‘ra, Tramp shtabi va Koen bilan kelishilgan holda pornoaktrisa undan 130 ming dollar, Playboy modeli esa American Media Inc kompaniyasidan 150 ming dollar olgan. Koen, shuningdek, Senat razvedka qo‘mitasiga soxta ma’lumotlar taqdim etganlikda aybdor deb topilgan.
Trampning o‘zi esa ma’shuqalarining sukut saqlashi uchun pul to‘laganini “keyinroq” bilgani va ularga pul o‘tkazishga rahbarlik qilmaganini aytgan.
Izoh (0)