Bangladesh hukumati qo‘shni Myanmadan qochib kelgan 100 mingga yaqin roxinja xalqi vakillarini Bhasan Char oroligi ko‘chirmoqchi. Bu haqda Deutsche Welle xabar berdi.
Qayd etilishicha, qochqinlar uchun mo‘ljallangan shahar deyarli qurib bitkazilgan. Mazkur loyihani amalga oshirish uchun bir yarim yil vaqt ketgan.
Orolning bo‘lajak aholisi uchun oddiy, ammo keng beton uylar, politsiya punktlari, tibbiy muassasalar va noqulay ob-havodan yashirinish uchun boshpanalar ko‘zda tutilgan. Keyinchalik manzilgoh kengaytiriladi va unda 400 ming nafargacha odam yashashi mumkin bo‘ladi.
Mutaxassislarning fikricha, bo‘lajak ko‘chmanchilar tabiiy ofatlarga duch keladi. Ochiq okeanda joylashgan tekis orolda iqlim o‘zgarishi sababli tez-tez sodir bo‘luvchi siklonlardan yashirinish uchun hech qanday joy yo‘q.
Bhasan Char oroli dengizdan — taxminan 20 yil avval paydo bo‘lgan va ayrim mutaxassislar u yana cho‘kishi mumkin, degan fikrda.
Bangladesh hukumati barcha ehtimoliy xavflar hisobga olinib, ehtiyot choralari ko‘rilishini ta’kidlagan. Aksariyat qochqinlar unga ishonmayapti. Ular tabiiy ofatlardan qo‘rqmoqda va tashqi dunyodan ajralishni istamaydi. Ammo, ta’kidlanishicha, davlat bunga jiddiy bel bog‘lagan.
‘Agar ular o‘z xohishlari bilan borishni istamasalar, ularni majbur qilamiz’— degan Bangladesh tashqi ishlar vaziri Abul Kalam Abdul Mo‘min. U, shuningdek, hukumat rejasida BMT rasmiylarning roxinja xalqini ko‘chirish tadbirida ishtiroki ko‘zda tutilmaganini aytgan.Musulmonlardan bo‘lgan roxinja xalqining 730 dan ortiq vakili Bangladeshga qo‘shni Myanmadan 2017-yilda qochib kelgan. Qochqinlarni etnik tozalash, sudsiz o‘ldirish hamda zo‘rlashlar haqida aytib bergan. Qochqinlarning so‘zlariga ko‘ra, bularning barchasi mamlakat armiyasi tomonidan sodir etilgan.
Myanmada esa bunday ayblovlarga javob tariqasida ular aytgan ma’lumotlar to‘qima ekanligi, askarlar aksilterrorchilik harakatini amalga oshirgani, roxinja xalqining o‘zi ularga hujum qilgani aytilgan.
Izoh (0)