Бангладеш ҳукумати қўшни Мьянмадан қочиб келган 100 мингга яқин рохинжа халқи вакилларини Бҳасан Чар оролиги кўчирмоқчи. Бу ҳақда Deutsche Welle хабар берди.
Қайд этилишича, қочқинлар учун мўлжалланган шаҳар деярли қуриб битказилган. Мазкур лойиҳани амалга ошириш учун бир ярим йил вақт кетган.
Оролнинг бўлажак аҳолиси учун оддий, аммо кенг бетон уйлар, полиция пунктлари, тиббий муассасалар ва ноқулай об-ҳаводан яшириниш учун бошпаналар кўзда тутилган. Кейинчалик манзилгоҳ кенгайтирилади ва унда 400 минг нафаргача одам яшаши мумкин бўлади.
Мутахассисларнинг фикрича, бўлажак кўчманчилар табиий офатларга дуч келади. Очиқ океанда жойлашган текис оролда иқлим ўзгариши сабабли тез-тез содир бўлувчи циклонлардан яшириниш учун ҳеч қандай жой йўқ.
Бҳасан Чар ороли денгиздан — тахминан 20 йил аввал пайдо бўлган ва айрим мутахассислар у яна чўкиши мумкин, деган фикрда.
Бангладеш ҳукумати барча эҳтимолий хавфлар ҳисобга олиниб, эҳтиёт чоралари кўрилишини таъкидлаган. Аксарият қочқинлар унга ишонмаяпти. Улар табиий офатлардан қўрқмоқда ва ташқи дунёдан ажралишни истамайди. Аммо, таъкидланишича, давлат бунга жиддий бел боғлаган.
‘Агар улар ўз хоҳишлари билан боришни истамасалар, уларни мажбур қиламиз’— деган Бангладеш ташқи ишлар вазири Абул Калам Абдул Мўмин. У, шунингдек, ҳукумат режасида БМТ расмийларнинг рохинжа халқини кўчириш тадбирида иштироки кўзда тутилмаганини айтган.Мусулмонлардан бўлган рохинжа халқининг 730 дан ортиқ вакили Бангладешга қўшни Мьянмадан 2017 йилда қочиб келган. Қочқинларни этник тозалаш, судсиз ўлдириш ҳамда зўрлашлар ҳақида айтиб берган. Қочқинларнинг сўзларига кўра, буларнинг барчаси мамлакат армияси томонидан содир этилган.
Мьянмада эса бундай айбловларга жавоб тариқасида улар айтган маълумотлар тўқима эканлиги, аскарлар аксилтеррорчилик ҳаракатини амалга оширгани, рохинжа халқининг ўзи уларга ҳужум қилгани айтилган.
Изоҳ (0)