3-sentabr, seshanba kuni Toshkentda “Moskva muhandislik-fizika instituti” milliy tadqiqot yadro universiteti (MMFI MTYaU) filialining tantanali ochilish marosimi bo‘lib o‘tdi. Bu haqda “Daryo” muxbiri Sevara Nishonova xabar berdi.
Ochilish marosimida O‘zbekiston bosh vaziri Abdulla Aripov, “Rosatom” atom energiyasi bo‘yicha davlat korporatsiyasi bosh direktori Aleksey Lixachyov, O‘zbekiston Energetika vaziri, bosh vazir maslahatchisi Alisher Sultonov, hukumatning oliy rahbariyat vakillari, “O‘zatom” agentligi, “Rosatom” davlat korporatsiyasi vakillari va OAV xodimlari ishtirok etdi.
Toshkentda “Moskva muhandislik-fizika instituti” milliy tadqiqot yadro universiteti filiali bitiruvchilari O‘zbekistonda va xorijda tan olinadigan Rossiya namunasidagi dimlomlar oladi va atom sohasidagi mahalliy korxonalarda ish o‘rinlari bilan ta’minlanadi.
Ochilish marosimida nutq so‘zlagan O‘zbekiston bosh vaziri Abdulla Aripov tadbir ishtirokchilarini ochilish marosimi bilan tabrikladi.
“Ochilish marosimining O‘zbekistonda mustaqillik bayramini nishonlash kunlariga to‘g‘ri kelgani alohida ahamiyatlidir. Ma’lumki, ushbu oliy ta’lim dargohi O‘zbekiston Prezidentining o‘tgan yilning iyul oyida qabul qilgan alohida qaroriga muvofiq tashkil etildi. Davlatimiz rahbari bir yil oldin Yadro fizikasi institutiga tashrifi chog‘ida aynan shu yerda ushbu universitet filialini tashkil etish bo‘yicha ko‘rsatma bergan edi. Ko‘rib turganingizdek hozir bu yerda zamonaviy va innovatsion o‘quv korpusi qurib bitkazildi hamda xalqaro standartlarga muvofiq eng zamonaviy laboratoriya uskunalari va o‘quv jihozlari bilan ta’minlandi. Ushbu OTMning tashkil etilishi Markaziy Osiyoda birinchi atom elektr stansiyasining barpo etilishi bilan bog‘liqdir. Shu sababli maxsus bilim va ko‘nikmalarga ega yuqori malakali mutaxassislarga talab juda yuqori bo‘ladi”, — deydi bosh vazir.
“O‘zbekistonda birinchi atom elektr stansiyasining qurilishi ko‘lamli loyihadir. Uni amalga oshirish, so‘zsiz, kadrlar salohiyatiga bog‘liq. Kadrlarni tayyorlash esa mamlakat atom tarmog‘ini muvaffaqiyatli rivojlanishi uchun asos bo‘ladi. Ushbu sohada o‘zbekistonlik hamkasblarimiz bilan hamkorligimiz muvaffaqiyatli rivojlanayotganidan mamnunmiz”, — dedi Aleksey Lixachyov.
Bu yerda ilk bor 100 nafar talaba imtihonlardan muvaffaqiyatli o‘tib, yaqin kunlarda o‘qishni yangi kampusda boshlaydi. O‘qish budjet asosida bo‘ladi.
Izoh (0)