3 сентябрь, сешанба куни Тошкентда «Москва муҳандислик-физика институти» миллий тадқиқот ядро университети (ММФИ МТЯУ) филиалининг тантанали очилиш маросими бўлиб ўтди. Бу ҳақда «Дарё» мухбири Севара Нишонова хабар берди.
Очилиш маросимида Ўзбекистон бош вазири Абдулла Арипов, «Росатом» атом энергияси бўйича давлат корпорацияси бош директори Алексей Лихачёв, Ўзбекистон Энергетика вазири, бош вазир маслаҳатчиси Алишер Султонов, ҳукуматнинг олий раҳбарият вакиллари, «Ўзатом» агентлиги, «Росатом» давлат корпорацияси вакиллари ва ОАВ ходимлари иштирок этди.
Тошкентда «Москва муҳандислик-физика институти» миллий тадқиқот ядро университети филиали битирувчилари Ўзбекистонда ва хорижда тан олинадиган Россия намунасидаги димломлар олади ва атом соҳасидаги маҳаллий корхоналарда иш ўринлари билан таъминланади.
Очилиш маросимида нутқ сўзлаган Ўзбекистон бош вазири Абдулла Арипов тадбир иштирокчиларини очилиш маросими билан табриклади.
«Очилиш маросимининг Ўзбекистонда мустақиллик байрамини нишонлаш кунларига тўғри келгани алоҳида аҳамиятлидир. Маълумки, ушбу олий таълим даргоҳи Ўзбекистон Президентининг ўтган йилнинг июль ойида қабул қилган алоҳида қарорига мувофиқ ташкил этилди. Давлатимиз раҳбари бир йил олдин Ядро физикаси институтига ташрифи чоғида айнан шу ерда ушбу университет филиалини ташкил этиш бўйича кўрсатма берган эди. Кўриб турганингиздек ҳозир бу ерда замонавий ва инновацион ўқув корпуси қуриб битказилди ҳамда халқаро стандартларга мувофиқ энг замонавий лаборатория ускуналари ва ўқув жиҳозлари билан таъминланди. Ушбу ОТМнинг ташкил этилиши Марказий Осиёда биринчи атом электр станциясининг барпо этилиши билан боғлиқдир. Шу сабабли махсус билим ва кўникмаларга эга юқори малакали мутахассисларга талаб жуда юқори бўлади», — дейди бош вазир.
«Ўзбекистонда биринчи атом электр станциясининг қурилиши кўламли лойиҳадир. Уни амалга ошириш, сўзсиз, кадрлар салоҳиятига боғлиқ. Кадрларни тайёрлаш эса мамлакат атом тармоғини муваффақиятли ривожланиши учун асос бўлади. Ушбу соҳада ўзбекистонлик ҳамкасбларимиз билан ҳамкорлигимиз муваффақиятли ривожланаётганидан мамнунмиз», — деди Алексей Лихачёв.
Бу ерда илк бор 100 нафар талаба имтиҳонлардан муваффақиятли ўтиб, яқин кунларда ўқишни янги кампусда бошлайди. Ўқиш бюджет асосида бўлади.
Изоҳ (0)