28-avgust kuni Qozog‘istonning “Spassk” o‘quv poligonida razvedkachilar o‘rtasida boshlangan “Oltin ukki—2019” xalqaro musobaqasi 2-sentabr kuni yakuniga yetdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Mazkur musobaqada O‘zbekiston Mudofaa vazirligi jamoasi ham ishtirok etib, faxrli ikkinchi o‘rinni qo‘lga kiritdi. Birinchi o‘rin mezbon davlatga nasib etgan bo‘lsa, kuchli uchlikka rossiyalik razvedkachilar yakun yasadi.
Shuningdek, musobaqada Belarus, Rossiya, Hindistondan kelgan jamoalar hamda Qozog‘iston Mudofaa vazirligining o‘zidan 5 ta jamoa ishtirok etdi.
“Razvedkachilar musobaqa davomida 12 turdagi turli murakkab o‘quv-jangovar mashqlarini bajardi. Har bir guruh — 100 kilometrdan ortiq bo‘lgan masofani bosib o‘tdi. Bundan tashqari maxsus bo‘linmalar maxfiy joylarni jihozlash, murakkab hududlarda razvedka va qidiruv ishlarini olib borish, dushmanlarning kutilmagan hujumlarini qaytarishdi, suvli to‘siqlarni bosib o‘tish va harbiy topografiya, o‘t ochish va muhandislik mashg‘ulotlarini o‘tkazdilar”, — deyiladi xabarda.
Tantanali taqdirlash marosimida O‘zbekiston Mudofaa vazirligiga Qozog‘iston harbiy razvedkasining ramzi bo‘lgan — kumush ukki sovg‘a qilindi.
Izoh (0)