Andijon viloyati hokimi Shuhratbek Abdurahmonovning 2019-yil 22-avgustdagi qaroriga asosan Mirzohid Botirov viloyat hokimligi matbuot xizmati rahbari — axborot siyosati masalalari bo‘yicha maslahatchisi etib tayinlandi. Bu haqda “Daryo”ga viloyat hokimligi xabar bermoqda.
Shuningdek, viloyat hokimining shu kuni qabul qilingan yana bir qarori bilan viloyat hokimligi boshqaruv apparati tuzilmasiga belgilangan umumiy shtat birligi va mehnat haqi fondi doirasidan chiqmagan holda o‘zgartirishlar kiritilgan.
Unga ko‘ra, viloyati hokimligi axborot xizmati rahbari — matbuot kotibi hamda axborot xizmati ommaviy axborot vositalari va jamoatchilik bilan aloqalar, veb-resurslar va ijtimoiy tarmoqlar bilan ishlash bo‘yicha yetakchi mutaxassis lavozimlari joriy etildi.
Mirzohid Botirov 1974-yilda Andijon viloyatining Bo‘z tumanida tug‘ilgan. 1997-yilda Andijon qishloq xo‘jalik institutini olim-agronom mutaxassisligi bo‘yicha tamomlagan. Turli yillarda Bo‘z tumani va Farg‘ona shahar hokimliklarida, Farg‘ona politexnika hamda Andijon qishloq xo‘jaligi institutlarida yuqori lavozimlarda ishlagan. Ushbu lavozimga tayinlangunga qadar Toshkent davlat agrar universiteti Andijon filiali direktorining yoshlar bilan ishlash bo‘yicha o‘rinbosari lavozimida faoliyat yuritgan.
2018-yilda “G‘o‘za-g‘alla navbatlab ekishning oraliq muddatida beda yetishtirishning samaradorligi (Farg‘ona viloyat och-tusli o‘tloqi-saz tuproqlari sharoitida)” mavzusi bo‘yicha dissertatsiya yoqlab, qishloq xo‘jaligi fanlari falsafa doktori (PhD) ilmiy darajasiga ega bo‘lgan. Uning 30 dan ortiq ilmiy, 200 ga yaqin publitsistik materiallari respublika va xalqaro jurnallarda chop etilgan. U “So‘z mehri” hamda “Armonning davomi” she’riy kitoblari muallifi ham hisoblanadi.
Eslatib o‘tamiz, O‘zbekiston Prezidentining 2019-yil 27-iyundagi “Ommaviy axborot vositalari mustaqilligini ta’minlash hamda davlat organlari va tashkilotlari axborot xizmatlari faoliyatini rivojlantirish bo‘yicha qo‘shimcha chora-tadbirlar to‘g‘risida”gi qaroriga muvofiq, axborot xizmati rahbari — matbuot kotibi axborot siyosati masalalari bo‘yicha viloyat hokimining maslahatchisi maqomiga ega bo‘lib, mehnatga haq to‘lash va transport xizmati ko‘rsatish shartlariga ko‘ra, viloyat hokimining o‘rinbosariga tenglashtiriladi.
Viloyat hokimligining ismi sir qolishini so‘ragan manbaning ma’lumotlariga ko‘ra, munosib va yosh jurnalistlarning yo‘qligi sababli matbuot xizmati haligacha to‘la tarkibda shakllanmagan.
Izoh (0)