Andijon viloyatining Qo‘rg‘ontepa tumanida bayram arafasida 4 ta davlat, 3 ta xususiy-sherikchilik va 14 ta oilaviy, jami 21 ta zamonaviy maktabgacha ta’lim muassasasi foydalanishga topshirildi. Bu haqda “Daryo”ga tuman maktabgacha ta’lim bo‘limi mudirasi Ro‘zixon Usmonoxunova ma’lum qildi.
Uning aytishicha, shu bilan tumandagi bog‘chalarning umumiy soni 91 taga yetgan. Natijada 3 yoshdan 7 yoshgacha bo‘lgan 16 ming 620 nafar boladan 8 ming 960 nafarini qamrab olishga erishilgan.
“Obod qishloq” hamda Investitsiya davlat dasturlari doirasida joriy yilda tumandagi 4 ta MTM qayta ta’mirlangan. Jumladan, 150 bolani o‘z bag‘riga oladigan 37-davlat maktabgacha ta’lim muassasasi investitsiya dasturi doirasida ta’mirlanib, foydalanishga topshirilgan.
Ta’mirlangunga qadar bog‘chada 80 nafar bola tarbiyalangan bo‘lsa, kapital ta’mirlashdan so‘ng 150 nafar bola qabul qilinadi.
Maktabgacha ta’lim muassasasida tarbiyalanuvchilar uchun zamonaviy oshxona, sport, harbiy-vatanparvarlik, yo‘l harakati qoidalari maydonchasi, ota-onalar va bolalar kutubxonasi, yozgi ayvonchalar hamda sahna maydonchasi qurildi. MTM zamonaviy yumshoq mebel hamda o‘yinchoqlar bilan to‘liq ta’minlandi.
Xavfsizlikni ta’minlash maqsadida barcha xonalar zamonaviy raqamli videokuzatuv hamda qayd etish kameralari bilan jihozlangan. Buning uchun 2 milliard 600 million so‘m sarflangan.
— Muassasamizning eski holatini ko‘rsangiz nafaqat bolalar, balki biz tarbiyachilarga ham rahmingiz kelishi aniq edi, — deydi muassasa tarbiyachisi Madinaxon Hakimova. — Bino ikki qavatli bo‘lsa-da, faqat birinchi qavatidan foydalanardik. Shunda ham nurab ketgan, zax xonalarda ishlashga majbur bo‘lganmiz. Qurilish ishlari yakunlanganida bog‘chamizni o‘zimiz tanimay qoldik.
Eslatib o‘tamiz, avvalroq Farg‘ona viloyatida 10 mingdan ortiq bolani qamrab olish quvvatiga ega 320 ta nodavlat maktabgacha ta’lim muassasasi foydalanishga topshirilgani haqida xabar berilgandi.
Izoh (0)