Andijon viloyatining Xonobod shahrida “O‘zbekiston temir yo‘llari” aksiyadorlik jamiyati tasarrufidagi “Olovuddin” bolalar sog‘lomlashtirish oromgohi o‘n yillik tanaffusdan so‘ng qayta ta’mirlanib, foydalanishga topshirildi. Bu haqda “Daryo” muxbiri xabar bermoqda.
Xonobod shahri hokimi Musaxon Mamadaliyevning aytishicha, mazkur oromgoh Andijon suv ombori yonbag‘irlaridagi so‘lim va bahavo maskanda joylashgan bo‘lib, ьustaqillikning ilk yillarida xususiylashtirish hisobiga tadbirkorga berilgan. Biroq deyarli 10 yildan ortiq faoliyat olib bormagan.
Prezidentning 2017-yilda Xonobod shahriga tashrifi davomida bergan topshirig‘i hamda hukumat qarori bilan tasdiqlangan 2017—2019-yillarda Xonobod shahrini kompleks rivojlantirish chora-tadbirlari to‘g‘risidagi dasturiga asosan oromgoh “O‘zbekiston temir yo‘llari” aksiyadorlik jamiyati tasarrufiga o‘tkazilgan. 2017—2019-yillar davomida “Qo‘qon mintaqaviy temir yo‘l uzeli” unitar korxonasi hamda “Andijon mexanika zavodi” shu’ba korxonasi tomonidan oromgohda to‘liq rekonstruksiya ishlari bajarilgan.
Mavsum davomida 800 nafar o‘g‘il-qizni qabul qilishi kutilayotgan oromgohda 200 o‘rinli yotoqxona, oshxona, ma’muriy bino hamda tibbiy ko‘rik xonasi qayta qurilgan. Shuningdek, ota-onalar paviloni, kir yuvish binosi, amfiteatr, ikkita ochik suv havzasi, yuvinish paviloni, kirish-chiqish nazorat punkti, turli o‘yin maydonlari, dam olish o‘rindiqlari, dekorativ fontan, suv tozalash binosi, ma’naviyat va ma’rifat xonasi hamda kutubxona qayta ta’mirlanib, zamonaviy ko‘rinishga keltirilgan.
Buning uchun jamiyat tomonidan 19,5 milliard so‘m mablag‘ sarflangan.
Izoh (0)