Pekinda hamkorlik bo‘yicha O‘zbekiston—Xitoy Hukumatlararo qo‘mitasi yig‘ilishini o‘tkazishga tayyorgarlik doirasida energetika sohasi bo‘yicha qo‘mita huzuridagi ishchi guruhning beshinchi yig‘ilishi bo‘lib o‘tdi.
Tomonlar Xitoyning yetakchi kompaniyalarini jalb etgan va ularning tajribasidan foydalangan holda O‘zbekistonda quyosh energetikasi sohasida soha standartlari va sinov laboratoriyalarini yaratish borasida hamkorlik qilishga tayyor ekanliklarini ma’lum qildi.
Bundan tashqari, neft-gaz, ko‘mir, elektr energetikasi, tabiiy uran va qayta tiklanuvchi energiya manbalari sohasidagi hamkorlik masalalari va istiqbollari ko‘rib chiqildi.
Neft-kimyo, xomashyoni qayta ishlash orqali yuqori qo‘shimcha qiymatli mahsulot ishlab chiqarish va ishlab chiqarishni mahalliylashtirish sohalarida hamkorlik qilish yuzasidan kelishuvlarga erishildi.
Ekspertlar darajasida faol uchrashuvlar o‘tkazish va istiqbolli loyihalarni batafsil qayta ishlash bo‘yicha qaror qabul qilindi.
Majlisda Namangan viloyatida maishiy chiqindilarni qayta ishlash yo‘li bilan ekologik toza elektr energiyasi ishlab chiqarish bo‘yicha o‘zaro anglashuv memorandumi imzolandi.
Loyiha to‘g‘ridan to‘g‘ri Xitoy kompaniyasining sarmoyasi asosida amalga oshiriladi.
Qo‘mita majlisi yakuni bo‘yicha energetika sohasida hamkorlik borasida navbatdagi majlis Toshkentda o‘tkazilishi bo‘yicha kelishuvga erishildi.
Izoh (0)