Андижон вилояти ҳокими Шуҳратбек Абдураҳмоновнинг 2019 йил 22 августдаги қарорига асосан Мирзоҳид Ботиров вилоят ҳокимлиги матбуот хизмати раҳбари — ахборот сиёсати масалалари бўйича маслаҳатчиси этиб тайинланди. Бу ҳақда «Дарё»га вилоят ҳокимлиги хабар бермоқда.
Шунингдек, вилоят ҳокимининг шу куни қабул қилинган яна бир қарори билан вилоят ҳокимлиги бошқарув аппарати тузилмасига белгиланган умумий штат бирлиги ва меҳнат ҳақи фонди доирасидан чиқмаган ҳолда ўзгартиришлар киритилган.
Унга кўра, вилояти ҳокимлиги ахборот хизмати раҳбари — матбуот котиби ҳамда ахборот хизмати оммавий ахборот воситалари ва жамоатчилик билан алоқалар, веб-ресурслар ва ижтимоий тармоқлар билан ишлаш бўйича етакчи мутахассис лавозимлари жорий этилди.
Мирзоҳид Ботиров 1974 йилда Андижон вилоятининг Бўз туманида туғилган. 1997 йилда Андижон қишлоқ хўжалик институтини олим-агроном мутахассислиги бўйича тамомлаган. Турли йилларда Бўз тумани ва Фарғона шаҳар ҳокимликларида, Фарғона политехника ҳамда Андижон қишлоқ хўжалиги институтларида юқори лавозимларда ишлаган. Ушбу лавозимга тайинлангунга қадар Тошкент давлат аграр университети Андижон филиали директорининг ёшлар билан ишлаш бўйича ўринбосари лавозимида фаолият юритган.
2018 йилда «Ғўза-ғалла навбатлаб экишнинг оралиқ муддатида беда етиштиришнинг самарадорлиги (Фарғона вилоят оч-тусли ўтлоқи-саз тупроқлари шароитида)» мавзуси бўйича диссертация ёқлаб, қишлоқ хўжалиги фанлари фалсафа доктори (ПҳД) илмий даражасига эга бўлган. Унинг 30 дан ортиқ илмий, 200 га яқин публицистик материаллари республика ва халқаро журналларда чоп этилган. У «Сўз меҳри» ҳамда «Армоннинг давоми» шеърий китоблари муаллифи ҳам ҳисобланади.
Эслатиб ўтамиз, Ўзбекистон Президентининг 2019 йил 27 июндаги «Оммавий ахборот воситалари мустақиллигини таъминлаш ҳамда давлат органлари ва ташкилотлари ахборот хизматлари фаолиятини ривожлантириш бўйича қўшимча чора-тадбирлар тўғрисида»ги қарорига мувофиқ, ахборот хизмати раҳбари — матбуот котиби ахборот сиёсати масалалари бўйича вилоят ҳокимининг маслаҳатчиси мақомига эга бўлиб, меҳнатга ҳақ тўлаш ва транспорт хизмати кўрсатиш шартларига кўра, вилоят ҳокимининг ўринбосарига тенглаштирилади.
Вилоят ҳокимлигининг исми сир қолишини сўраган манбанинг маълумотларига кўра, муносиб ва ёш журналистларнинг йўқлиги сабабли матбуот хизмати ҳалигача тўла таркибда шаклланмаган.
Изоҳ (0)