Avvalroq, O‘zbekiston Qurolli Kuchlari akademiyasi tashabbusi bilan Toshkent shahri ko‘chalari bo‘ylab “Biz sog‘lom turmush tarafdorimiz” shiori ostida 5 kilometrlik marafon o‘tkazilishi haqida xabar berilgandi. Bugun, 3-sentabr kuni erta tongda boshlangan mazkur marafon yakuniga yetdi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Erta tongdan Qurolli Kuchlar akademiyasi saf maydoni akademiya shaxsiy tarkibi, ofitserlar, serjantlar, harbiy pensionerlar, kursantlar, turli tashkilot hamda vazirliklardan tashrif buyurgan mehmonlar va poytaxtning sportga befarq bo‘lmagan ko‘ngilli fuqarolari bilan to‘ldi.
Marafon ishtirokchilari Qurolli Kuchlar akademiyasidan start olib, Kichik xalqa yo‘li – Taraqqiyot ko‘chasi – “Ashxobod sayilgohi” istirohat bog‘i – Mirzo Ulug‘bek shoh ko‘chasi va Parkent ko‘chasi orqali akademiyadagi finishga yetib keldi.
Bayramona kayfiyatda bo‘lib o‘tgan marafonda O‘zbekiston Prezidenti huzuridagi Xavfsizlik kengashi kotibi Viktor Mahmudov va Mudofaa vaziri o‘rinbosari general-mayor Azizbek Ikramov ham faol ishtirok etdi.
“Barcha qatnashchilarni, avvalo, ona Vatanimizning istiqlol bayrami bilan chin qalbimdan tabriklayman. Mana shunday sport tadbirlarida faol ishtirok etib kelayotgan harbiy xizmatchilar, pensionerlar va ko‘ngilli fuqarolarga o‘z minnatdorligimni bildiraman”, – dedi general-mayor Azizbek Ikramov.
Marafon so‘ngida yo‘nalishlar bo‘yicha aniqlangan g‘olib va sovrindorlarga diplom va esdalik sovg‘alari berildi.
Izoh (0)