Tarixga aylangan hafta hukumat tizimidagi keskin kadr almashtirishlar bilan yoziladigan bo‘ldi. Prezident ko‘plab arboblarni taqdirladi. Eng muhimi – bu hafta amaldorlarimiz sira qovun tushirmadi. Mustaqillik arafasi tinch va ko‘tarinki kayfiyatda kechdi. Dayjestimizni boshladik.
O‘zbekiston endi fazoni o‘zlashtiradi. Vazirlar Mahkamasi huzurida Kosmik tadqiqotlar va texnologiyalar agentligi (“O‘zbekkosmos”) tashkil etilmoqda. Belgilanishicha, stratosfera va uchuvchisiz uchish apparatlari, shuningdek, Yerni masofadan turib zondlash va yo‘ldoshli aloqa kosmik apparatlarini qo‘llagan holda davlat organlariga masalalarni hal etish samaradorligini oshirishda ko‘maklashish hamda boshqa bir qator ishlar “O‘zbekkosmos”ning vazifasiga kiradi. “O‘zbekkosmos” agentligi bosh direktori maqomi, mehnatga haq to‘lash, tibbiy va transport xizmati ko‘rsatish shartlariga ko‘ra, vazirning birinchi o‘rinbosariga, bosh direktor o‘rinbosarlari esa vazir o‘rinbosarlariga tenglashtiriladi.
* * *
Shavkat Mirziyoyevning farmoniga muvofiq, bir guruh o‘zbekistonliklar va O‘zbekiston bilan samarali hamkorlik qilib kelayotgan xorijliklar faxriy unvonlar, orden va medallar bilan taqdirlandi. Qoraqalpog‘iston Jo‘qorg‘i Kenesi raisi Musa Yerniyazov, farg‘onalik fermer Lola Murodova hamda “Nuroniy” jamg‘armasining Samarqand bo‘limi raisi Hasan Normurodovlar “O‘zbekiston Qahramoni” unvoni bilan taqdirlandi.
Rossiya elchisi Vladimir Tyurdenev “Mehnat shuhrati” ordeni, Frederik Star, Helena Freyzer, Trent Kelli, Jon Makgregor “Do‘stlik” ordeni bilan mukofotlandi. Ular minnatdorchilik nutqini o‘zbek tilida so‘zladi.
Qator madaniyat arboblari ham unvonlardan benasib qolmadi. Adib Xudoyberdi To‘xtaboyev, aktyor Afzal Rafiqov, xonandalar Sevara Nazarxon, Munojat Yo‘lchiyeva, Zamira Suyunova, aktrisa Klara Jalilova va boshqa ko‘plab fan, adabiyot, san’at vakillari ham mukofotlandi. Bu yilgi taqdirlashlarning e’tiborga molik tarafi shundaki, mustaqillik davrida oliy davralardan uzoq turgan, yuz yoshni qoralagan yozuvchi va shoir Shukrullo ham “Mehnat shuhrati” ordeni bilan qutlandi.
100 yoshdan oshgan 14 nafar fuqaro “Shuhrat” medali bilan taqdirlandi.
Bundan tashqari, ko‘plab viloyat hokimlari, qator tumanlar hokimlari hamda apparat xodimi, Markaziy bank raisi va boshqa davlat mansabdorlariga orden-medallar taqildi. Materialda hajm cheklangani bois ularning ism-shariflarini ushbu havoladan o‘qib olishni tavsiya etamiz.
* * *
Samarqandda “Sharq taronalari” festivali ochilishi oldidan Shavkat Mirziyoyev o‘zbekistonlik va xorijlik blogerlar bilan uchrashib selfiga tushdi. Taniqli bloger Xushnudbek Xudoyberdiyev prezident bilan yonma-yon tushgan rasmini “tarixiy selfi” deya blogiga joyladi. AOKA raisining o‘rinbosari Saida Mirziyoyeva prezidentning blogerlar bilan uchrashuvini “tarixiy” deb atadi. Shavkat Mirziyoyev uchrashuvda “Orangizda o‘zimizning qorako‘zlarimizni ko‘rib turibman. Bu menga iftixor bag‘ishlaydi. Bilingki, Prezident sizlarni doim qo‘llab-quvvatlaydi”, dedi.
* * *
Bu hafta hukumat tizimida kadrlar almashinuviga boy bo‘ldi. E’tibor, asosan, yosh kadrlarga qaratilayotganini ta’kidlash joizdir. Keling, ushbu muhim o‘zgarishlar bilan dayjestimizda qisqacha tanishtirib o‘tamiz.
Bandlik va mehnat munosabatlari vaziri lavozimida ishlab kelgan Sherzod Qudbiyev prezidentning davlat xizmati va davlat hokimiyati organlari bilan hamkorlik qilish masalalari bo‘yicha maslahatchisi bo‘ldi.
“Yoshlar ittifoqi” yetakchisi Qahramon Quronboyev endilikda davlat xizmati va davlat hokimiyati organlari bilan hamkorlik qilish masalalari bo‘yicha prezident maslahatchisiga aylandi. Uning kelin-kuyov kortejini to‘xtatib yoshlarni taksiga o‘tirgizib yuborgani o‘tgan yili mashhur voqeaga aylangan edi.
Xo‘sh, Quronboyev o‘rniga kim tayinlandi? Uning o‘rinbosari Alisher Sa’dullayev. 23 yoshida Xalq ta’limi vaziriga o‘rinbosari bo‘lgan Alisher 25 yoshida ittifoq raisligiga tayinlanib, bir vaqtning o‘zida prezidentning yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisiga birinchi o‘rinbosar ham bo‘ldi. Yoshlar ittifoqining yetakchisi yoshlardan bo‘lishi mantiqqa ham mos keladi.
Din ishlari bo‘yicha qo‘mitada ham kadrlar almashinuvi bo‘ldi. Qo‘mita raisi Jasur Akromov, rais o‘rinbosari — Diniy-ijtimoiy jarayonlarni o‘rganish axborot-tahlil markazi direktori Nuriymon Abulhasan ishdan ozod etildi. Hozircha ularning o‘rniga hech kim tayinlangani yo‘q.
* * *
Yaqinda nojoiz fotosuratlari tarqab ketgan Andijon shahri hokimi hafta boshida ishdan olindi. Uning o‘rniga vaqtincha boshqa odam qo‘yildi. Shundan so‘ng sobiqqa aylangan hokim Dilmurod Rahmatullayev videomurojaat bilan chiqib, “tarqalgan murojaat va muloqotlar yolg‘on”, dedi. “Buni Andijon shahri, viloyati va rahbariyatining obro‘siga putur yetkazish, deb o‘ylayman. Buni qoralayman, la’natlayman”, deb ta’kidladi. Uning oxirgi so‘zlari o‘zbek internetida mashhur bo‘lib ketdi va memlardan o‘rin oldi.
Internet saytlari ishtiroki bilan hokimbuva ishdan olinganidan so‘ng, odatdagiday, rasmiy nashrlar u haqdagi tanqidiy materiallarni ko‘p kuttirmadi. Viloyat hokimligi muassisligidagi “Andijonnoma” gazetasi Dilmurod Rahmatullayev avvallari 30 ga yaqin holatda qonun talablariga zid hujjatlarni imzolagani haqida yozdi.
Dayjestimiz so‘ngida o‘quvchilarni Mustaqillik bayrami bilan qutlaymiz. Elimizga tinch-omonlik, turmushimizga farovonlik va baraka yor bo‘lsin. Bu hafta ko‘ngilli yangiliklarga boy bo‘ldi. Bunday keyin ham ko‘ngilli xabarlar ko‘paysin, deymiz. “Daryo” sizga har qanday xabarlarni tezkorlik bilan yetkazishda davom etadi.
Izoh (0)