Тарихга айланган ҳафта ҳукумат тизимидаги кескин кадр алмаштиришлар билан ёзиладиган бўлди. Президент кўплаб арбобларни тақдирлади. Энг муҳими – бу ҳафта амалдорларимиз сира қовун туширмади. Мустақиллик арафаси тинч ва кўтаринки кайфиятда кечди. Дайжестимизни бошладик.
Ўзбекистон энди фазони ўзлаштиради. Вазирлар Маҳкамаси ҳузурида Космик тадқиқотлар ва технологиялар агентлиги («Ўзбеккосмос») ташкил этилмоқда. Белгиланишича, стратосфера ва учувчисиз учиш аппаратлари, шунингдек, Ерни масофадан туриб зондлаш ва йўлдошли алоқа космик аппаратларини қўллаган ҳолда давлат органларига масалаларни ҳал этиш самарадорлигини оширишда кўмаклашиш ҳамда бошқа бир қатор ишлар «Ўзбеккосмос»нинг вазифасига киради. «Ўзбеккосмос» агентлиги бош директори мақоми, меҳнатга ҳақ тўлаш, тиббий ва транспорт хизмати кўрсатиш шартларига кўра, вазирнинг биринчи ўринбосарига, бош директор ўринбосарлари эса вазир ўринбосарларига тенглаштирилади.
* * *
Шавкат Мирзиёевнинг фармонига мувофиқ, бир гуруҳ ўзбекистонликлар ва Ўзбекистон билан самарали ҳамкорлик қилиб келаётган хорижликлар фахрий унвонлар, орден ва медаллар билан тақдирланди. Қорақалпоғистон Жўқорғи Кенеси раиси Муса Ерниязов, фарғоналик фермер Лола Муродова ҳамда «Нуроний» жамғармасининг Самарқанд бўлими раиси Ҳасан Нормуродовлар «Ўзбекистон Қаҳрамони» унвони билан тақдирланди.
Россия элчиси Владимир Тюрденев «Меҳнат шуҳрати» ордени, Фредерик Стар, Ҳелена Фрэйзер, Трент Келли, Жон Макгрегор «Дўстлик» ордени билан мукофотланди. Улар миннатдорчилик нутқини ўзбек тилида сўзлади.
Қатор маданият арбоблари ҳам унвонлардан бенасиб қолмади. Адиб Худойберди Тўхтабоев, актёр Афзал Рафиқов, хонандалар Севара Назархон, Муножат Йўлчиева, Замира Суюнова, актриса Клара Жалилова ва бошқа кўплаб фан, адабиёт, санъат вакиллари ҳам мукофотланди. Бу йилги тақдирлашларнинг эътиборга молик тарафи шундаки, мустақиллик даврида олий давралардан узоқ турган, юз ёшни қоралаган ёзувчи ва шоир Шукрулло ҳам «Меҳнат шуҳрати» ордени билан қутланди.
100 ёшдан ошган 14 нафар фуқаро «Шуҳрат» медали билан тақдирланди.
Бундан ташқари, кўплаб вилоят ҳокимлари, қатор туманлар ҳокимлари ҳамда аппарат ходими, Марказий банк раиси ва бошқа давлат мансабдорларига орден-медаллар тақилди. Материалда ҳажм чеклангани боис уларнинг исм-шарифларини ушбу ҳаволадан ўқиб олишни тавсия этамиз.
* * *
Самарқандда «Шарқ тароналари» фестивали очилиши олдидан Шавкат Мирзиёев ўзбекистонлик ва хорижлик блогерлар билан учрашиб селфига тушди. Таниқли блогер Хушнудбек Худойбердиев президент билан ёнма-ён тушган расмини «тарихий селфи» дея блогига жойлади. АОКА раисининг ўринбосари Саида Мирзиёева президентнинг блогерлар билан учрашувини «тарихий» деб атади. Шавкат Мирзиёев учрашувда «Орангизда ўзимизнинг қоракўзларимизни кўриб турибман. Бу менга ифтихор бағишлайди. Билингки, Президент сизларни доим қўллаб-қувватлайди», деди.
* * *
Бу ҳафта ҳукумат тизимида кадрлар алмашинувига бой бўлди. Эътибор, асосан, ёш кадрларга қаратилаётганини таъкидлаш жоиздир. Келинг, ушбу муҳим ўзгаришлар билан дайжестимизда қисқача таништириб ўтамиз.
Бандлик ва меҳнат муносабатлари вазири лавозимида ишлаб келган Шерзод Қудбиев президентнинг давлат хизмати ва давлат ҳокимияти органлари билан ҳамкорлик қилиш масалалари бўйича маслаҳатчиси бўлди.
«Ёшлар иттифоқи» етакчиси Қаҳрамон Қуронбоев эндиликда давлат хизмати ва давлат ҳокимияти органлари билан ҳамкорлик қилиш масалалари бўйича президент маслаҳатчисига айланди. Унинг келин-куёв кортежини тўхтатиб ёшларни таксига ўтиргизиб юборгани ўтган йили машҳур воқеага айланган эди.
Хўш, Қуронбоев ўрнига ким тайинланди? Унинг ўринбосари Алишер Саъдуллаев. 23 ёшида Халқ таълими вазирига ўринбосари бўлган Алишер 25 ёшида иттифоқ раислигига тайинланиб, бир вақтнинг ўзида президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчисига биринчи ўринбосар ҳам бўлди. Ёшлар иттифоқининг етакчиси ёшлардан бўлиши мантиққа ҳам мос келади.
Дин ишлари бўйича қўмитада ҳам кадрлар алмашинуви бўлди. Қўмита раиси Жасур Акромов, раис ўринбосари — Диний-ижтимоий жараёнларни ўрганиш ахборот-таҳлил маркази директори Нуриймон Абулҳасан ишдан озод этилди. Ҳозирча уларнинг ўрнига ҳеч ким тайинлангани йўқ.
* * *
Яқинда ножоиз фотосуратлари тарқаб кетган Андижон шаҳри ҳокими ҳафта бошида ишдан олинди. Унинг ўрнига вақтинча бошқа одам қўйилди. Шундан сўнг собиққа айланган ҳоким Дилмурод Раҳматуллаев видеомурожаат билан чиқиб, «тарқалган мурожаат ва мулоқотлар ёлғон», деди. «Буни Андижон шаҳри, вилояти ва раҳбариятининг обрўсига путур етказиш, деб ўйлайман. Буни қоралайман, лаънатлайман», деб таъкидлади. Унинг охирги сўзлари ўзбек интернетида машҳур бўлиб кетди ва мемлардан ўрин олди.
Интернет сайтлари иштироки билан ҳокимбува ишдан олинганидан сўнг, одатдагидай, расмий нашрлар у ҳақдаги танқидий материалларни кўп куттирмади. Вилоят ҳокимлиги муассислигидаги «Андижоннома» газетаси Дилмурод Раҳматуллаев авваллари 30 га яқин ҳолатда қонун талабларига зид ҳужжатларни имзолагани ҳақида ёзди.
Дайжестимиз сўнгида ўқувчиларни Мустақиллик байрами билан қутлаймиз. Элимизга тинч-омонлик, турмушимизга фаровонлик ва барака ёр бўлсин. Бу ҳафта кўнгилли янгиликларга бой бўлди. Бундай кейин ҳам кўнгилли хабарлар кўпайсин, деймиз. «Дарё» сизга ҳар қандай хабарларни тезкорлик билан етказишда давом этади.
Изоҳ (0)