Shavkat Mirziyoyev tomonidan 28-avgust kuni imzolangan “O‘zbekiston Respublikasi davlat mustaqilligining yigirma sakkiz yilligi munosabati bilan fan, ta’lim, sog‘liqni saqlash, adabiyot, madaniyat va san’at sohalari xodimlaridan bir guruhini mukofotlash to‘g‘risida”gi farmonga muvofiq klinik o‘lim holatidagi bolaning hayotini saqlab qolgan otolaringolog shifokor Sergey Tobias mukofotlandi.
Toshkent shahri Yunusobod tumanida joylashgan “Lor plyus servis” xususiy klinikasi otolaringolog shifokori Sergey Tobias “Shuhrat” medali bilan taqdirlangan.
Iyul oyida ikki yashar Umar Nurillayev ota-onasi tomonidan Sergey Tobias ishlaydigan klinikaga klinik o‘lim holatida olib kelingan. Sergey reanimatolog bo‘lmasa ham uzoq vaqt davomida maxsus vositalarsiz bolakayning yuragini massaj qilib, uning hayotini saqlab qolgan.
Voqea aks etgan video ijtimoiy tarmoqlarda tarqab, ko‘plab ijobiy fikr va munosabatlarga sabab bo‘lgan.
Shundan so‘ng Sog‘liqni saqlash vaziri Alisher Shodmonov Sergey Tobiasni “Sog‘liqni saqlash a’lochisi” ko‘krak nishoni bilan taqdirlagan.
Izoh (0)