Шавкат Мирзиёев томонидан 28 август куни имзоланган «Ўзбекистон Республикаси давлат мустақиллигининг йигирма саккиз йиллиги муносабати билан фан, таълим, соғлиқни сақлаш, адабиёт, маданият ва санъат соҳалари ходимларидан бир гуруҳини мукофотлаш тўғрисида»ги фармонга мувофиқ клиник ўлим ҳолатидаги боланинг ҳаётини сақлаб қолган отоларинголог шифокор Сергей Тобиас мукофотланди.
Тошкент шаҳри Юнусобод туманида жойлашган «Лор плюс сервис» хусусий клиникаси отоларинголог шифокори Сергей Тобиас «Шуҳрат» медали билан тақдирланган.
Июль ойида икки яшар Умар Нуриллаев ота-онаси томонидан Сергей Тобиас ишлайдиган клиникага клиник ўлим ҳолатида олиб келинган. Сергей реаниматолог бўлмаса ҳам узоқ вақт давомида махсус воситаларсиз болакайнинг юрагини массаж қилиб, унинг ҳаётини сақлаб қолган.
Воқеа акс этган видео ижтимоий тармоқларда тарқаб, кўплаб ижобий фикр ва муносабатларга сабаб бўлган.
Шундан сўнг Соғлиқни сақлаш вазири Алишер Шодмонов Сергей Тобиасни «Соғлиқни сақлаш аълочиси» кўкрак нишони билан тақдирлаган.
Изоҳ (0)