Yakkabog‘ tumani hokimi o‘rinbosarini ustiga benzin sepib, uni yoqib yuborgan tadbirkor Bahriddin Isomov qayta sud-psixologiya ekspertizasi xulosasidan so‘ng 29-avgust kuni qamoqdan ozod etildi. Bu haqda tadbirkorning advokati Muzaffar Obidovga asoslanib, “AdvokatNews.uz” xabar bermoqda. Tadbirkor sudga o‘z uyidan qatnaydi.
Advokatning so‘zlariga ko‘ra, Qarshi universiteti psixologiya fakulteti olimlaridan iborat ekspertlar guruhi 24-avgust kuni Bahriddin Isomov to‘g‘risida “o‘sha xatti-harakatni sodir etgan vaqtida affekt holatida bo‘lgan” deb xulosa bergan. Ushbu xulosa asosida, Yakkabog‘ tumani prokurori sanksiyasi bilan ayblov Jinoyat kodeksining 97-moddasi (qasddan odam o‘ldirish)dan 98-modda (kuchli ruhiy hayajonlanish holatida qasddan odam o‘ldirish)ga qayta malakalanib, ayblov yengillashgani munosabati bilan qamoqqa olish ehtiyot chorasi bekor qilingan.
Advokatning aytishicha, Bahriddin Isomov shu bilan uchinchi marta ruhiy ekspertiza qilingan. Avvalroq, jinoiy ish qo‘zg‘atilgach, u sud-psixiatriya ekspertizasidan o‘tkazish uchun Toshkentga jo‘natilgani haqida xabar qilingan edi. Respublika sud-ekspertiza markazida o‘tkazilgan sud-psixiatriya tekshiruvida, protsessual qonunchilikka asosan uning umumiy ruhiy ahvolini o‘rganilib, ijobiy xulosa berilgan. Shundan so‘ng ayblanuvchining jinoiy qilmishni sodir etish chog‘ida affekt holatida bo‘lgan-bo‘lmaganini aniqlashtirish maqsadida sud-psixologik ekspertiza tayinlangan.Advokat Muzaffar Obidovning so‘zlariga ko‘ra, ushbu ekspertiza masalaga yuzaki va bir tomonlama qarab, ayblanuvchining ruhiy ahvolini hisobga olmagan. “Psixolog mutaxassislar himoyamdagi shaxs bilan hatto biror marta suhbatlashmagan ham. Uning ayblanishiga sabab bo‘lgan xatti-harakatning sodir etilishidagi vaziyat, motivlar puxta o‘rganilmagan. Shunchaki, tergov materiallari nari-beri varaqlanib, ‘bu odam o‘z xatti-harakatlariga javob bera oladi’, degan mazmunda xulosa tayyorlashgan”, — deydi advokat.
Bundan xabar topgan advokat viloyat prokuroriga iltimosnoma yozib, himoyasi ostidagi shaxsga qayta ekspertiza tayinlanishiga erishgan. Bu safar Qarshi universiteti psixolog olimlaridan tashkil topgan ekspertlar Isomovning ruhiyatini va tergov materiallarini sinchiklab o‘rganib chiqqach, jamiyatda katta rezonans keltirib chiqargan “Yakkabog‘ voqeasi” asosiy ishtirokchilaridan bo‘lgan mahalliy tadbirkorning o‘sha vaqtda affekt, ya’ni kuchli ruhiy hayajonda bo‘lganini tasdiqlagan.
Ish qayta malakalanishi bilan birga tergov tugatilib, materiallar sudga taqdim qilingan. “Sud jamiyatning voqeaga nisbatan reaksiyasini hisobga olib, yengilroq jazo tayinlaydi, deb umid qilaman. Qolaversa, o‘sha mashhur ‘snos’ mojarolariga hukumat va Prezident qanday munosabat bildirganini, keyin qanday o‘zgarishlar bo‘lganini yaxshi bilasiz. Bu yog‘ini ko‘ramiz”, — deya advokat Obidovning so‘zlaridan iqtibos keltirmoqda “AdvokatNews.uz”.
Eslatib o‘tamiz, Jinoyat kodeksining 98-moddasida kuchli ruhiy hayajonlanish holatida qasddan odam o‘ldirganlik uchun 2 yildan besh yilgacha ozodlikni cheklash yoxud 5 yilgacha ozodlikdan mahrum qilish jazosi ko‘zda tutilgan.
Izoh (0)